Олий Мажлис Сенати раиси Танзила Норбоева АҚШ Конгресси Сенати аъзоси, сенатор-демократ Гери Питерсни қабул қилди. Бу ҳақда парламент юқори палатаси матбуот хизмати хабар берди.
Маълум қилинишича, учрашувда Ўзбекистон—АҚШ ҳамкорлигининг кенг доираси, хусусан, парламентлараро алоқаларни мустаҳкамлаш, савдо-иқтисодий, меҳнат муносабатлари, гендер тенглиги соҳаларида ҳамкорликни ривожлантириш масалалари муҳокама қилинган.
Суҳбат давомида иқтисодий ҳамкорлик масалаларига ҳам эътибор қаратилган. Икки томонлама стратегик шерикликни мустаҳкамлашга таркибига 38 та етакчи компания кирадиган Америка—Ўзбекистон савдо палатаси салмоқли ҳисса қўшаётгани, 2023 йилнинг январь—июль ойларида товар айирбошлаш ҳажми 321,5 миллион долларни ташкил этгани таъкидланган. Инвестициявий ҳамкорликни кенгайтириш ва икки давлат ишбилармон доиралари ўртасидаги алоқаларни мустаҳкамлаш юзасидан фикр алмашилган.
Шунингдек, меҳнат муносабатлари йўналишидаги ҳамкорликни изчил давом эттириш, бунда муносиб меҳнат шароитларини яратиш, меҳнат соҳасига халқаро стандартларни жорий этиш каби масалаларда доимий маслаҳатлашувларни олиб боришга келишиб олинган.
“Марказий Осиё—АҚШ” C5+1 форматидаги мулоқот доирасида келгуси йилда Америка томони (USAID) билан тадбиркор аёлларнинг C5+1 форматида ўтадиган Халқаро форум, унда тадбиркор аёлларнинг фаол иштироки масалалари ҳам муҳокама қилинган.
“Инсон ҳуқуқларини таъминлаш, эътиқод ва сўз эркинлиги масалалари ҳам алоҳида эътибор марказида бўлди. Мулоқот сўнгида томонлар барча соҳаларда ўзаро манфаатли ҳамкорликни янада кенгайтириш ва чуқурлаштиришга тайёр эканликларини билдирдилар”, — дейилади хабарда.
Президент Шавкат Мирзиёев 25 август куни АҚШ Сенати Миллий хавфсизлик ва ҳукумат ишлари бўйича қўмитаси раиси Гери Питерсни қабул қилганди. Учрашувда Ўзбекистон билан АҚШ ўртасидаги стратегик шериклик муносабатларини янада мустаҳкамлаш масалалари кўриб чиқилган.
Изоҳ (0)