O‘zbekiston mustaqilligining o‘ttiz ikki yilligi munosabati bilan bir guruh chet el investorlarini mukofotlash to‘g‘risidagi prezident farmoni qabul qilindi. Bu haqda Prezident matbuot xizmati xabar berdi.
Unga ko‘ra, davlatlar o‘rtasidagi ko‘p qirrali va o‘zaro manfaatli hamkorlikni har tomonlama rivojlantirish, diplomatik, savdo-iqtisodiy, sarmoyaviy, ilmiy-texnikaviy va madaniy-gumanitar sohalardagi aloqalarni kengaytirishga qo‘shayotgan katta hissasi, mamlakat iqtisodiyotiga investitsiyalarni jalb etish, samarali innovatsion loyihalar va qo‘shma dasturlarni amalga oshirish, respublikadagi islohotlar va demokratik o‘zgarishlarni, O‘zbekiston tomonidan ilgari surilayotgan global va mintaqaviy tashabbuslarni faol qo‘llab-quvvatlash borasidagi alohida xizmatlari, shuningdek, xalqlar orasidagi do‘stlik va hamjihatlik rishtalarini mustahkamlash yo‘lidagi ibratli faoliyati uchun quyidagilar “Do‘stlik” ordeni bilan mukofotlandi:
- Gurjiy Stepan Leonidovich — Rossiya “Lukoyl” aksiyadorlik jamiyatining Markaziy Osiyo, Yaqin Sharq va Shimoliy Afrika bo‘yicha vitse-prezidenti;
- Muxammad Abunayyan — Saudiya Arabistoni Podshohligi ACWA Power kompaniyasi boshqaruvi raisi;
- Muxammad Jamil Al-Ramaxiy — Birlashgan Arab Amirliklari Masdar kompaniyasi bosh ijrochi direktori;
- Jemil Kazanji — Turkiya Aksa Energy kompaniyasi boshqaruv kengashi raisi;
- Mexmet Jengiz — Turkiya Cengiz Holding kompaniyasi asoschisi;
- Shandor Chani — Vengriyaning “OTP Bank” boshqaruvi raisi;
- Seyfollax Gasemi — Amerika Qo‘shma Shtatlarining Air Products kompaniyasi boshqaruvi raisi;
- Peris Muratoglu — Fransiyaning Total Eren kompaniyasi boshqaruvi raisi.
Izoh (0)