25 август оқшомида АҚШнинг Оклахома штатида ўтказилган мактаб ўқувчилари ўртасидаги футбол матчида отишма содир этилди. Оқибатда камида тўрт киши яраланди.
Отишма Оклахома Сити яқинидаги Чокто шаҳрида “Дел Сити Иглиз” ва “Чокто Еллоужекец” жамоалари ўртасидаги ўйиннинг учинчи чорагида содир бўлди, деб хабар берди News9 полицияга таяниб. Отишма лаҳзаси кадрларга тушган.
Яраланганлар орасида оёғидан ўқ еган 15 ёшли қиз ҳам бор. Яна бир ўсмир (ёши кўрсатилмаган) Оклахома-Ситидаги касалхонага вертолётда етказилган. Жабрланганларнинг аҳволи ҳозирча номаълум. Бир ярадорга стадионда тиббий ёрдам кўрсатилиб, кейин уйига юборилган.
Fox25 телеканалига кўра, гумонланувчи ҳозирча қўлга олинмаган. Чокто полициясининг маълум қилишича, отишмада кулранг свитер кийган афро-америкалик гумон қилинмоқда. Гумонланувчи автомашинада воқеа жойидан қочиб кетган.
Полиция маълумотларига кўра, отишмада Дел-Сити шаҳрининг хизматдан ташқаридаги полиция ходими иштирок этган бўлиши мумкин. Полиция бошлиғи Лойд Бергер офицер бирор кимга қарата ўқ узганини тасдиқлай олмади, бироқ у қурол ишлатганини тасдиқлади.
Мактаб атрофи ва футбол майдонига яқин жойда бир неча йўл-транспорт ҳодисалари қайд этилган.
Изоҳ (0)