Тошкент давлат иқтисодиёт университети мазкур ОТМ профессор-ўқитувчиларига бир хил форма жорий этилиши, университет ректорат биноси эшигининг ёпилгани ҳамда матбуот котибига катта миқдорда мукофот пули берилгани тўғрисида тарқалган хабарларга муносабат билдирди.
Қайд этилишича, Тошкент давлат иқтисодиёт университети Одоб-ахлоқ кодексининг 11-бандига асосан университетда профессор-ўқитувчи, ходим, докторант ва талабалар ўз ўқиш ва касбига мос замонавий кийимда бўлишлари лозимлиги белгилаб қўйилган. Университетнинг ушбу ички ҳужжати жамоавий келишув асосида қабул қилинган.
“Университет томонидан форма жорий этилиши олийгоҳ брендини ривожлантириш ва жамоатчилик ўртасида ижобий имижни шакллантиришга қаратилган бўлиб, формани олиш ёки кийиш ҳеч кимга мажбурий эмас. Маҳсулот маъқул келган тақдирда, олишлари мумкинлиги ҳақида профессор-ўқитувчиларга хабар берилган”, — дейилади муносабатда.
Таъкидланишича, янги ўқув йилига тайёргарлик ишлари доирасида ректоратга чиқиш зиналари қайта таъмирланмоқда. Бу вазиятда хавфсизликни таъминлаш ва ишчи-усталар фаолиятига халақит бермаслик мақсадида бино эшиги қисқа муддатга ёпилган.
Шунингдек, муносабатда университет матбуот котибига 100 миллион сўм миқдорида мукофот пули ёзилгани рад этилган.
“Университет ахборот сиёсати масалалари бўйича ректор маслаҳатчиси — матбуот котиби Ирода Турсунбоевага нисбатан ҳам ҳақиқатга мутлақо зид бўлган маълумотлар ёзилган. Яъни унга Ижтимоий-маънавий муҳитни таъминлашга масъул ректор маслаҳатчиси 100 миллион сўм миқдорда мукофот пули ёздириб бергани урғуланган. Бу ёлғон маълумот экани ва ҳақиқатга мутлақо тўғри келмаслигини маълум қиламиз. Шахс қадр-қиммати, шаънини топташ, уни жамоат орасида обрўсизлантирганлик учун ҳар бир шахс қонун олдида жавобгарлигини эслатиб ўтамиз”, — дейилади муносабатда.
Тошкент давлат иқтисодиёт университетида 2019 йил 25 ноябрдан бошлаб ўқиш ҳафтаси беш кунлик этиб белгиланганди. Шунингдек, ўшанда университетда форма ҳам бутунлай бекор қилингани маълум бўлганди. “Энди талабалар ўқишга исталган кийимида келиши мумкин. Ҳеч ким уларни кўйлак кийишга, галстук тақишга мажбурламайди”, — дейилган эди хабарда.
Изоҳ (0)