Serbiya prezidenti Aleksandr Vuchich ukrainalik hamkasbi Vladimir Zelenskiy bilan uchrashuvda Belgrad Ukrainaning hududiy yaxlitligini hurmat qilishini aytdi. Zelenskiy, o‘z navbatida, tomonlar “umumyevropa uyi”da Ukraina va Serbiya kelajagini muhokama qilgani haqida yozdi. Ikkala siyosatchi ham Afinadagi forum doirasida o‘tkazilgan muzokaralarni “samimiy va ochiq” deb atadi.
“Ukraina prezidenti Vladimir Zelenskiy bilan Serbiya va Ukraina, shuningdek, mintaqa va butun dunyo uchun muhim bo‘lgan barcha masalalar yuzasidan samimiy va ochiq suhbat bo‘lib o‘tdi. Biz Ukraina, Kosovo va Metoxiyadagi voqealarga to‘xtaldik. Serbiya Ukrainaning hududiy yaxlitligini hurmat qilishini yana bir bor ta’kidladim, bu haqda biz urush boshidan beri aniq qilib aytmoqdamiz”, — deb yozdi Vuchich Instagram’da.
Vuchichdan keyin Zelenskiy uchrashuv haqida fikr bildirdi. Ukraina prezidenti serb hamkasbi bilan har ikki tomon manfaatlariga daxldor masalalarni, xususan, kelajakda Ukraina—Serbiya munosabatlarini rivojlantirishni muhokama qilganini aytdi.
“Serbiya prezidenti bilan ochiq, samimiy va samarali uchrashuv bo‘ldi. BMT nizomiga hurmat va chegaralar daxlsizligi, umumyevropa uyidagi xalqlarimizning yakdil kelajagi haqida yaxshi suhbat”, — deb yozdi Zelenskiy Telegram’da.
Ma’lumot uchun, Rossiya qo‘shinlari Ukrainaga bostirib kirganidan keyin Serbiya bir necha bor Rossiyaga qarshi sanksiyalar qo‘llashdan bosh tortgan. Aleksandr Vuchich bunday cheklovlarni samarasiz deb atagan.
Izoh (0)