Serbiya prezidenti Aleksandr Vuchich “Vagner” xususiy harbiy kompaniyasidan mamlakat fuqarolarini Rossiya—Ukraina urushida qatnashish uchun yollashni to‘xtatishni talab qildi. Bu haqda u Happy Television serb telekanaliga bergan intervyusida ma’lum qildi, deb xabar bermoqda Reuters.
“Nega siz, ‘Vagner’dagilar, Serbiyadan odamlarni safingizga qo‘shilish uchun chaqiryapsiz, vaholanki bu bizning qonunlarga zid ekanini bilasiz” — deya Vuchichning so‘zlarini keltiradi Reuters.
Dekabr oyi boshida “Vagner markazi” Telegram kanali “do‘stlik va hamkorlik uchun rus-serb madaniyat-axborot markazi” ochilishini e’lon qilgandi. Yanvar oyi boshida AQSH Davlat departamenti maslahatchisi Derek Sholle Vashington “Vagner” guruhining Serbiya hududidagi faoliyatidan xavotirda ekanini aytdi. Bunday faoliyatga misol sifatida AP agentligi Rossiya OAVlarining Bolqon versiyasida joylashtirilgan “Vagner”ga ishga qabul qilish haqidagi e’lonlarni keltirdi.
Yanvar o‘rtalarida “RIA Novosti” agentligi Zaporojye viloyatining Rossiyaga qo‘shib olingan qismiga Serbiyadan birinchi “ko‘ngillilar” yetib kelgani haqida xabar berdi. Respublika mudofaa vaziri Milosh Vuchevich bu jinoiy javobgarlikka olib kelishi mumkinligi haqida ogohlantirdi. O‘z navbatida, “Vagner” asoschisi Yevgeniy Prigojin guruh Serbiyada mavjud emasligini aytgan. “Hozirda ‘Vagner’da serb fuqarolari yo‘q, ancha vaqtdan beri yo‘q”, — deya qo‘shimcha qilgan u.
Reuters xabariga ko‘ra, 2014 va 2015-yillarda serblar Ukrainadagi jangovar harakatlarda rossiyaparast kuchlar tomonida qatnashgan. Ukrainaning Serbiyadagi elchixonasi 2019-yilda bunday odamlar sonini 300 ga yaqin deb hisoblagandi.
Serbiya qonunlari mamlakat fuqarolariga xorijdagi qurolli mojarolarda qatnashishni taqiqlaydi. “Ozodlik” radiosining Serbiya xizmati ma’lumotlariga ko‘ra, mamlakat sudlari Ukrainada Rossiya tomonidan jang qilgan 30 dan ortiq kishiga ayblov e’lon qilgan.
Izoh (0)