Сербия президенти Александр Вучич украиналик ҳамкасби Владимир Зеленский билан учрашувда Белград Украинанинг ҳудудий яхлитлигини ҳурмат қилишини айтди. Зеленский, ўз навбатида, томонлар “умумевропа уйи”да Украина ва Сербия келажагини муҳокама қилгани ҳақида ёзди. Иккала сиёсатчи ҳам Афинадаги форум доирасида ўтказилган музокараларни “самимий ва очиқ” деб атади.
“Украина президенти Владимир Зеленский билан Сербия ва Украина, шунингдек, минтақа ва бутун дунё учун муҳим бўлган барча масалалар юзасидан самимий ва очиқ суҳбат бўлиб ўтди. Биз Украина, Косово ва Метохиядаги воқеаларга тўхталдик. Сербия Украинанинг ҳудудий яхлитлигини ҳурмат қилишини яна бир бор таъкидладим, бу ҳақда биз уруш бошидан бери аниқ қилиб айтмоқдамиз”, — деб ёзди Вучич Instagram’да.
Вучичдан кейин Зеленский учрашув ҳақида фикр билдирди. Украина президенти серб ҳамкасби билан ҳар икки томон манфаатларига дахлдор масалаларни, хусусан, келажакда Украина—Сербия муносабатларини ривожлантиришни муҳокама қилганини айтди.
“Сербия президенти билан очиқ, самимий ва самарали учрашув бўлди. БМТ низомига ҳурмат ва чегаралар дахлсизлиги, умумевропа уйидаги халқларимизнинг якдил келажаги ҳақида яхши суҳбат”, — деб ёзди Зеленский Telegram’да.
Маълумот учун, Россия қўшинлари Украинага бостириб кирганидан кейин Сербия бир неча бор Россияга қарши санкциялар қўллашдан бош тортган. Александр Вучич бундай чекловларни самарасиз деб атаган.
Изоҳ (0)