Bugungi kunda barchaning nigohi 65 ta bolajon hayotiga zomin bo‘lish masalasi yuzasidan sud jarayonida. Sudya advokatlarning qistovi bilan ochiq holda o‘tayotgan sud jarayonini yoritishda qatnashayotgan ommaviy axborot vositalarini va blogerlarning faoliyatini cheklab, bir necha bora ularga ogohlantirishlar berdi. Bu cheklovlar kimningdir manfaatlarini ko‘zlab qilinayotgani fikridan yiroqmiz, albatta.
Chunki bunday rezonansga ega bo‘lgan sud jarayoni ochiq holda o‘tkazilishi bugungi kunda davlatimiz rahbari tomonidan olib borilayotgan ochiqlik siyosatining namunasi bo‘lib, yakunda adolat qaror topishiga ishonamiz.
Ish bo‘yicha 21 nafar sudlanuvchilar ichida yaqin 3 yilda farmatsevtika sohasini butunlay boshqargan, barcha yo‘nalishlar uchun javobgar shaxslarning borligi, sud jarayonining yakunida barchasiga oddiy qorovul aybdor bo‘lib chiqmasligini anglatadi.
Shuningdek, sudlanuvchilar ichida Farmatsevtika tarmog‘ini rivojlantirish agentligi sobiq direktori S.K. ham bor.
Internet tarmog‘idan olingan ma’lumotlarga ko‘ra, 2021-yildan boshlab S.K. parallel ravishda “Dori vositalari, tibbiy buyumlar va tibbiy texnika ekspertizasi va standartlashtirsh davlat markazi” DUK rahbari lavozimida ham ishlagan.
Oddiy savol tug‘iladi, S.K. bir vaqtning o‘zida ham farmatsevtikani rivojlantirishga mas’ul Farmagentlikni hamda dorilar sifatiga mas’ul DUKni boshqara oldimi, kim unga ikkita o‘ta mas’uliyatli ishni bir vaqtning o‘zida topshirdi? Natijasi ayon, dori sifatini nazorat qilish tizimi zaiflashishi oqibatida 65 nafar bola vafot etdi.
Yana bir qiziq jihat, S.K. 2018-yil fevral oyiga qadar Jurabek laboratories QQ rahbari bo‘lib ishlagan va Farmagentlikka direktor bo‘lib tayinlangandan so‘ng, qo‘shma korxona rahbarligini onasi M.K.ga topshirgan.
Xo‘sh, S.K. bolalar o‘limida ayblanuvchilardan biri sifatida ishtirok etmoqda, lekin uning Jurabek laboratories QQ manfaatlarini ilgari surgan yoki surmaganligi masalasiga aniqlik kiritildimi?
Farmatsevtika tarmog‘ini rivojlantirish agentligi rasmiy Telegram kanalidagi postlarni o‘rganish davomida S.K.ning hududlarda farmsohasini rivojlantirish, yetakchi xorijiy farmatsevtika kompaniyalarini investor sifatida jalb qilish, farmatsevtika klasterini barpo etish hamda farmatsevtika sohasi ta’limi, ilmini yuksaklarga olib chiqish yuzasidan rejalariga guvoh bo‘lish mumkin. Xo‘sh, bu ishlarning qaysidir qismi bajarildimi?
Farmklasterni Markaziy Osiyoda o‘xshashi yo‘q loyiha, farmatsevtika sohasini rivojlantirishning lokomotivi deb e’tirof etilayotgan bir paytda nima uchun S.K. ishdan olingandan keyin qurilish ishlari to‘xtab qoldi? Farmatsevtika agentligi va uning tarkibiy tuzilmasida 19 milliard so‘mlik moliyaviy kamchiliklar aniqlangandi. Dastlabki tergov ushbu holatga oxirigacha baho berdimi?
Huquqni muhofaza qiluvchi organlardan mazkur masalalarga ham e’tibor qaratishlarini so‘rab qolardik.
Izoh (0)