Ijtimoiy tarmoqlarda OTMlar tomonidan talabalardan qonunchilik hujjatlariga ko‘ra talab qilish taqiqlangan hujjatlar so‘ralayotgani haqida ma’lumotlar tarqaldi. Adliya vazirligi ortiqcha hujjat talab qilganlik uchun javobgarlik borligini eslatdi.
Qonunchilikka ko‘ra, aholidan quyidagi hujjatlarni talab qilish bekor qilingan:
- shaxsni tasdiqlovchi hujjatning nusxasini;
- shaxsning belgilangan shakldagi fotosuratini;
- jismoniy shaxs tomonidan o‘rta maxsus, professional (kasb-hunar) ta’lim muassasasi yoki umumiy o‘rta ta’lim muassasasi (11-sinf negizida) tugatilganini tasdiqlovchi ma’lumotlarni (hujjatlarni);
- kam ta’minlangan oila yoki oila a’zosi sifatida ro‘yxatga olinganini tasdiqlovchi ma’lumotlarni (hujjatlarni);
- soliq to‘lovchi jismoniy shaxslarning davlat soliq xizmati organlarida hisobga qo‘yilganini tasdiqlovchi ma’lumotlarni (STIR);
- OTMlarga o‘qishga kirish uchun imtiyozga ega bo‘lgan abituriyentlarning imtiyoz huquqini tasdiqlovchi hujjat to‘g‘risida ma’lumotlarni.
“Ushbu hujjat va ma’lumotlarning talab qilinishi davlat xizmatlari ko‘rsatish sohasidagi qonunchilik hujjatlari talablarini buzish deb hisoblanib, ularni talab etgan davlat idoralari javobgarlikka tortiladi”, — deya ogohlantirdi Adliya vazirligi.
Shuningdek, ushbu hujjatlarni talab qilish holatlari kuzatilsa, Adliya vazirligi va hududiy adliya organlarining tegishli telefon raqamlariga murojaat qilish mumkinligi bildirildi.
Izoh (0)