Бугунги кунда барчанинг нигоҳи 65 та болажон ҳаётига зомин бўлиш масаласи юзасидан суд жараёнида. Судья адвокатларнинг қистови билан очиқ ҳолда ўтаётган суд жараёнини ёритишда қатнашаётган оммавий ахборот воситаларини ва блогерларнинг фаолиятини чеклаб, бир неча бора уларга огоҳлантиришлар берди. Бу чекловлар кимнингдир манфаатларини кўзлаб қилинаётгани фикридан йироқмиз, албатта.
Чунки бундай резонансга эга бўлган суд жараёни очиқ ҳолда ўтказилиши бугунги кунда давлатимиз раҳбари томонидан олиб борилаётган очиқлик сиёсатининг намунаси бўлиб, якунда адолат қарор топишига ишонамиз.
Иш бўйича 21 нафар судланувчилар ичида яқин 3 йилда фармацевтика соҳасини бутунлай бошқарган, барча йўналишлар учун жавобгар шахсларнинг борлиги, суд жараёнининг якунида барчасига оддий қоровул айбдор бўлиб чиқмаслигини англатади.
Шунингдек, судланувчилар ичида Фармацевтика тармоғини ривожлантириш агентлиги собиқ директори С.К. ҳам бор.
Интернет тармоғидан олинган маълумотларга кўра, 2021 йилдан бошлаб С.К. параллел равишда “Дори воситалари, тиббий буюмлар ва тиббий техника экспертизаси ва стандартлаштирш давлат маркази” ДУК раҳбари лавозимида ҳам ишлаган.
Оддий савол туғилади, С.К. бир вақтнинг ўзида ҳам фармацевтикани ривожлантиришга масъул Фармагентликни ҳамда дорилар сифатига масъул ДУКни бошқара олдими, ким унга иккита ўта масъулиятли ишни бир вақтнинг ўзида топширди? Натижаси аён, дори сифатини назорат қилиш тизими заифлашиши оқибатида 65 нафар бола вафот этди.
Яна бир қизиқ жиҳат, С.К. 2018 йил февраль ойига қадар Журабек лабораториэс ҚҚ раҳбари бўлиб ишлаган ва Фармагентликка директор бўлиб тайинлангандан сўнг, қўшма корхона раҳбарлигини онаси М.К.га топширган.
Хўш, С.К. болалар ўлимида айбланувчилардан бири сифатида иштирок этмоқда, лекин унинг Журабек лабораториэс ҚҚ манфаатларини илгари сурган ёки сурмаганлиги масаласига аниқлик киритилдими?
Фармацевтика тармоғини ривожлантириш агентлиги расмий Telegram каналидаги постларни ўрганиш давомида С.К.нинг ҳудудларда фармсоҳасини ривожлантириш, етакчи хорижий фармацевтика компанияларини инвестор сифатида жалб қилиш, фармацевтика кластерини барпо этиш ҳамда фармацевтика соҳаси таълими, илмини юксакларга олиб чиқиш юзасидан режаларига гувоҳ бўлиш мумкин. Хўш, бу ишларнинг қайсидир қисми бажарилдими?
Фармкластерни Марказий Осиёда ўхшаши йўқ лойиҳа, фармацевтика соҳасини ривожлантиришнинг локомотиви деб эътироф этилаётган бир пайтда нима учун С.К. ишдан олингандан кейин қурилиш ишлари тўхтаб қолди? Фармацевтика агентлиги ва унинг таркибий тузилмасида 19 миллиард сўмлик молиявий камчиликлар аниқланганди. Дастлабки тергов ушбу ҳолатга охиригача баҳо бердими?
Ҳуқуқни муҳофаза қилувчи органлардан мазкур масалаларга ҳам эътибор қаратишларини сўраб қолардик.
Изоҳ (0)