Byurokratiyasiz biznes: O‘zbekistonda davlatning biznesni tartibga solishga qaratilgan 500 ta funksiyasi bekor qilindi

Bugungi kunda byurokratiya tadbirkorlikni rivojlantirishga to‘sqinlik qiluvchi asosiy omillardan biri ekani hech kimga sir emas. Shu munosabat bilan O‘zbekistonda davlat tomonidan byurokratiyani qisqartirish bo‘yicha ko‘rilayotgan chora-tadbirlar biznes yuritish va, umuman, milliy iqtisodiyotni yanada rivojlantirish uchun yangi imkoniyatlar ochib bermoqda.

Tadbirkorlarga yaratilayotgan yengilliklar odamlarda o‘z biznesini ochish ishtiyoqini oshiradi, xususiy sektorda ishchilar soni ko‘payishiga xizmat qiladi, bu orqali esa odamlarning turmush darajasi oshadi. Farovon turmush esa o‘z navbatida davlatning barqaror rivjolanishining asosiy omili hisoblanadi.

O‘zbekistonda tadbirkorlik faoliyatining to‘siqlarsiz amalga oshirishni ta’minlash, biznes yuritish uchun qulay shart-sharoitlar yaratish va aholining barcha qatlamlariga teng imkoniyatlar yaratib berish maqsadida tadbirkorlik subyektlarining huquqlari va qonuniy manfaatlarini himoya qilish tizimi yanada takomillashtirildi.

Jumladan:

— Ijro hokimiyati tizimi isloh qilinib, byurokratiya kamaytirildi. Davlatning biznesni tartibga solishga qaratilgan 500 ta funksiyasi bekor qilindi;

— Hozirgi kunga qadar 132 ta litsenziya va ruxsat berishga oid hujjatlar bekor qilindi, 33 tasi bo‘yicha xabardor qilish tartibi kiritildi, litsenziya va ruxsatnoma berish tartib-taomillari soddalashtirildi;

— Ilgari yangi tadbirkorlar uchun “kirish qiyin bo‘lgan” 119 ta faoliyat bo‘yicha litsenziya va ruxsatnomalar bekor qilindi yoki xabardor qilish shakliga o‘tkazildi.

Birgina, respublika hududida yuklarni avtomobilda tashish kabi faoliyat bo‘yicha litsenziyalarni bekor qilish hisobiga yuk tashish hajmi 1,5 baravarga oshdi.

— “business.gov.uz” yagona interaktiv portali negizida “Tadbirkor virtual ofisi” axborot tizimi ishga tushirilib, raqamli texnologiyalar orqali tadbirkorar murojaatlarini qabul qilish va ko‘tarilgan masalalarni tezkor hal qilish tizimi yaratildi;

— biznesni Internet orqali masofaviy hamda Davlat xizmatlari markazida 30 daqiqada ro‘yxatdan o‘tkazish imkoniyati yaratildi;

— davlat xizmatlarini ko‘rsatishda talab etiladigan hujjatlar 221 tadan 95 taga qisqardi, muddatlari esa 2 baravarga kamaydi;

— bugungi kunda Davlat xizmatlari markazlari orqali 280 turdagi xizmatlar ko‘rsatilmoqda, 150 tadan ortig‘i esa faqat elektron shaklda ko‘rsatilmoqda.

Natijada, so‘nggi 5 yil ichida respublikada ro‘yxatdan o‘tgan tabdirkorlik subyektlari soni qariyb 2 barobarga ko‘payib, 600 mingtaga yetdi.