O‘zbekistonda 2023-yil 1-yanvar holatiga ko‘ra ayol rahbarlar boshqaruvidagi korxonalar soni ma’lum bo‘ldi.
Statistika agentligi ma’lumotlariga ko‘ra, 2023-yilning 1-yanvar holatiga mamlakatda ayol rahbarlar boshqaruvidagi kichik korxona va mikrofirmalar soni 39 078 tani tashkil etgan. Ayol rahbarlar boshqaruvidagi kichik korxona va mikrofirmalar soni o‘tgan yilning mos davri bilan solishtirilganda 2 606 taga oshgan.
Kambag‘allikni qisqartirish va bandlik vazirligi xotin-qizlarni ish bilan ta’minlagan tadbirkorlarga qanday imtiyozlar borligi haqida tushuntirish bergandi. Unga ko‘ra, Vazirlar Mahkamasining 2022-yil 31-martdagi “Xotin-qizlar muammolarini o‘rganish va hal etish tizimini yanada takomillashtirish chora-tadbirlari to‘g‘risida”gi 145-son qarori bilan tasdiqlangan nizomga asosan tadbirkorlik subyektlarining “ayollar daftari”ga kiritilgan xotin-qizlarni ish bilan ta’minlashga qaratilgan loyihalariga Oilaviy tadbirkorlikni rivojlantirish davlat dasturi doirasidagi resurslar hisobidan yillik 14 foizlik stavkada imtiyozli kreditlar ajratilishi mumkin.
Bunda kichik tadbirkorlik subyektlari tomonidan “ayollar daftari”ga kiritilgan xotin-qizlarni doimiy ish bilan ta’minlash sharti bilan samaradorligi yuqori va barqaror ish o‘rinlari yaratishga qaratilgan loyihalariga Oilaviy tadbirkorlikni rivojlantirish Davlat dasturlari doirasidagi resurslar hisobidan 225 million so‘mdan ortiq, biroq 1 milliard so‘mdan ko‘p bo‘lmagan miqdorda belgilangan tartib asosida kredit ajratilishi mumkin.
Kredit summasining aniq miqdori tadbirkor tomonidan ish bilan ta’minlanadigan har bir xotin-qiz uchun 33 million so‘mgacha miqdorga mutanosib ravishda belgilanadi. Demak, mazkur kredit ish bilan ta’minlangan xotin-qizlarni soniga qarab berilishi inobatga olinadigan bo‘lsa, tadbirkor eng kamida 7 nafar xotin-qizni ish bilan ta’minlashi kerak. 33 million so‘mdan 7 nafar ish bilan ta’minlangan xotin-qizlar uchun maksimal 231 million so‘m kredit ajratiladi.
Agar 6 nafar ayollar ish bilan ta’minlansa, tadbirkorga ko‘pi bilan 198 million so‘m kredit ajratiladi. Unda yuqoridagi 225 million so‘mdan ortiq, biroq 1 milliard so‘mdan ko‘p bo‘lmagan degan joyiga tushmay qoladi. Shuning uchun eng kamida 7 nafar ayollar daftariga kiritilgan xotin-qizlarni ish bilan ta’minlash majburiyati bilan ish boshlash mumkin.
Izoh (0)