Xitoy AQSHning Osiyo-Tinch okeani mintaqasida harbiy bloklar yaratishga urinishlariga qarshilik qiladi. Bu haqda Xitoyning Amerikadagi elchixonasi AQSH, Janubiy Koreya va Yaponiya o‘rtasidagi uch tomonlama uchrashuvga javoban ma’lum qildi.
“Ishonchimiz komil, turli xilda izolyatsiya qilingan guruhlarni birlashtirish, shuningdek, bloklar to‘qnashuvi va harbiy bloklarni Osiyo-Tinch okeani mintaqasiga olib kirishga urinishlar qo‘llab-quvvatlanmaydi, ular faqatgina mintaqa davlatlarining ehtiyotkorligi va qarshiliklariga duch keladi”, — deyiladi elchixona bayonotida.
18-avgust kuni AQSH prezidenti Jo Bayden Yaponiya va Janubiy Koreya rahbarlari bilan uchrashdi. Vashington yaqinidagi prezident sanatoriysida bo‘lib o‘tgan uchrashuvdan so‘ng Yaponiya bosh vaziri Fumio Kisida, Janubiy Koreya prezidenti Yun Sok Yol va Bayden qo‘shma bayonot chiqarib, mamlakatlar Shimoliy Koreya bilan hech qanday shartlarsiz muloqotni tiklashga tayyorligini bildirdi va har yili yirik harbiy mashg‘ulotlar o‘tkazishini ma’lum qildi.
Bundan tashqari, Kisida va Bayden “Xitoyning Janubiy Xitoy dengizidagi so‘nggi xavfli xatti-harakatlaridan tashvish bildirgan”. Har ikki yetakchi Tayvan bo‘g‘ozida tinchlikni saqlashga sodiq qolishini ma’lum qilgan.
Yetakchilarning uchrashuvidan avval AQSH prezidentining milliy xavfsizlik bo‘yicha maslahatchisi Jeyk Sallivan Qo‘shma Shtatlar Janubiy Koreya va Yaponiya bilan NATO tipidagi rasmiy harbiy ittifoq tuzishni maqsad qilmayotganini aytgandi. U Tinch okeanida NATOning muqobili yaratilmasligini qat’iy ta’kidlagan.
Izoh (0)