Manchester Qirollik sudi hakamlar hay’ati Chester kasalxonasining yangi tug‘ilgan chaqaloqlarni parvarishlash bo‘limi 33 yoshli hamshirasi Lyusi Letbini yetti nafar chaqaloqni o‘ldirganlikda aybdor deb topdi. Bu haqda Associated Press va BBC xabar berdi.
Bundan tashqari Letbi yana olti chaqaloqni o‘ldirishga urinishda ayblandi. Hakamlar hay’ati chaqaloqlarni o‘ldirishga urinish bo‘yicha yana oltita ayblov yuzasidan hukm chiqara olmadi. Prokurorlar suddan 28 kun muhlat so‘radi, bu vaqtda ushbu moddalar bo‘yicha ayblov qayta ko‘rib chiqiladimi yoki yo‘qligi hal qilinadi.
Tergov ma’lumotlariga ko‘ra, Letbi barcha qotillik va qotillikka urinishlarni bir yil ichida — 2015-yilning iyunidan 2016-yilning iyunigacha sodir etgan. U xizmat vazifasini bajarayotib, bolalarning qon tomirlariga shpris bilan havo yuborgan, ortiqcha ovqatlantirgan yoki nay orqali oshqozoniga havo yuborgan, buyurilmagan insulin kiritgan. Ba’zi hollarda hamshiraning harakatlari bolalarning sog‘lig‘iga ta’sir qilgan, o‘limga olib kelmagan. Uning nima uchun bunday qilgani hozircha noma’lum, deya ta’kidladi Associated Press.
CNN yozishicha, politsiya Letbining uyini tintuv qilish chog‘ida uning qaydnomalarida quyidagi yozuvlarni topgan: “Men yashashga loyiq emasman. Men ularni qasddan o‘ldirdim, chunki ularga yetarlicha g‘amxo‘rlik qila olmayapman”.
Ikkinchi yozuvda “Men dahshatli yovuz odamman”, deya yoniga katta harflar bilan “Men yovuzman, buni men qildim” deb qo‘shib qo‘yilgan.
Hamshiraning o‘zi sudda aybini tan olmadi. Uning advokati ta’kidlashicha, chaqaloqlar sog‘lig‘ining keskin yomonlashishi va o‘limi tabiiy sabablar va boshqa omillar, jumladan, kasalxonada xodimlarning yetishmasligi yoki bolalarga yetarli darajada yordam ko‘rsatilmagani bilan bog‘liq bo‘lishi mumkin.
Politsiya 2017-yil may oyida chaqaloqlarning o‘limi bo‘yicha tergov boshlagandi, 2020-yil noyabr oyida Letbiga nisbatan ayblov e’lon qilindi. Sud 21-avgust kuni hamshiraga nisbatan hukm chiqarishi kerak.
Hamshira ishlagan bo‘limning yetakchi maslahatchisi BBC’ga aytishicha, shifoxona rasmiylari Letbiga qo‘yilgan ayblovlarni o‘z vaqtida tekshirmagan va hamshira ustidan shikoyat qilgan shifokorlarning ovozini o‘chirishga uringan.
Buyuk Britaniya hukumati Letbiga hukm chiqarilishi bilanoq mustaqil tergov o‘tkazishni buyurdi.
Izoh (0)