Buyuk Britaniyada 30 dan ortiq mutatsiyaga ega koronavirusning yangi BA.2.86 turi aniqlandi. Bu haqda mamlakat sog‘liqni saqlash xavfsizligi agentligiga (UKHSA) tayanib, The Guardian xabar berdi.
Koronavirusning bu turi ko‘p mutatsiyaga egaligi bilan olimlarni xavotirga solmoqda. BA.2.86 deb nomlangan variant genetik ketma-ketlik orqali aniqlangan, garchi hozirgacha bunday ketma-ketliklarning bir nechtasi haqida xabar berilgan.
“Biz BA.2.86 Buyuk Britaniyada aniqlanganidan xabardormiz. Vaziyat baholanmoqda va o‘z vaqtida qo‘shimcha maʼlumot beriladi”, — deydi UKHSA direktori o‘rinbosari doktor Mira Chand.
Ushbu turdagi kovid birinchi marta Isroilda aniqlangan, keyinchalik Daniya va AQSHda ro‘yxatga olingan.
Jahon sog‘liqni saqlash tashkiloti (JSST) BA.2.86 varianti ustidan monitoring o‘rnatganini aytgan: ko‘p sonli mutatsiyalar tufayli u “kuzatish ostidagi variantlar” ro‘yxatiga kiritilgan.
Hozirda dunyoda eng keng tarqalgan koronavirus variantlari XBB.1.16 va EG.5 hisoblanadi. Ular mos ravishda 101 va 50 ta davlatda aniqlangan.
Izoh (0)