Хитой АҚШнинг Осиё-Тинч океани минтақасида ҳарбий блоклар яратишга уринишларига қаршилик қилади. Бу ҳақда Хитойнинг Америкадаги элчихонаси АҚШ, Жанубий Корея ва Япония ўртасидаги уч томонлама учрашувга жавобан маълум қилди.
“Ишончимиз комил, турли хилда изоляция қилинган гуруҳларни бирлаштириш, шунингдек, блоклар тўқнашуви ва ҳарбий блокларни Осиё-Тинч океани минтақасига олиб киришга уринишлар қўллаб-қувватланмайди, улар фақатгина минтақа давлатларининг эҳтиёткорлиги ва қаршиликларига дуч келади”, — дейилади элчихона баёнотида.
18 август куни АҚШ президенти Жо Байден Япония ва Жанубий Корея раҳбарлари билан учрашди. Вашингтон яқинидаги президент санаторийсида бўлиб ўтган учрашувдан сўнг Япония бош вазири Фумио Кисида, Жанубий Корея президенти Юн Сок Ёль ва Байден қўшма баёнот чиқариб, мамлакатлар Шимолий Корея билан ҳеч қандай шартларсиз мулоқотни тиклашга тайёрлигини билдирди ва ҳар йили йирик ҳарбий машғулотлар ўтказишини маълум қилди.
Бундан ташқари, Кисида ва Байден “Хитойнинг Жанубий Хитой денгизидаги сўнгги хавфли хатти-ҳаракатларидан ташвиш билдирган”. Ҳар икки етакчи Тайван бўғозида тинчликни сақлашга содиқ қолишини маълум қилган.
Етакчиларнинг учрашувидан аввал АҚШ президентининг миллий хавфсизлик бўйича маслаҳатчиси Жейк Салливан Қўшма Штатлар Жанубий Корея ва Япония билан НАТО типидаги расмий ҳарбий иттифоқ тузишни мақсад қилмаётганини айтганди. У Тинч океанида НАТОнинг муқобили яратилмаслигини қатъий таъкидлаган.
Изоҳ (0)