“Maktabgacha taʼlim klasteri oldin yangilik edi. Bugungi kunga kelib ilk samaralarini ko‘rsatishga ham ulgurdi”. “Daryo” ushbu tizimni Namangan viloyati misolida o‘rgandi

Namanganda mamlakatda birinchilardan bo‘lib tashkil etilgan maktabgacha taʼlim klasteri muvaffaqiyatli faoliyat yuritmoqda. Bu haqda “Daryo” muxbiri Azizbek Abduvaliyev xabar berdi.

Mazkur klaster 2022-yil may oyida hukumatning tegishli qarori asosida Namangan pedagogika kolleji bazasida tashkil etildi. Bunga kollej binosi yonida 60-sonli maktabgacha taʼlim tashkiloti ham faoliyat boshlagani ayni muddao bo‘ldi.

“Oldinlari kollejimiz yonidagi hudud tashlandiq holatda edi. Vaholanki, atrofimizda 5 kilometr chamasi masofada davlat maktabgacha taʼlim muassasasi bo‘lmagan. Shuni inobatga olgan holda mutasaddi rahbarlarga berilgan taklifimiz jo‘yali deb topilib, 2021-yili zamonaviy 180 o‘rinli bog‘cha qad rostladi.

Qolaversa, o‘zimizning kollej binosida, birinchi qavatda shu bog‘chaning 150 o‘rinli filiali ham tashkil etildi. O‘quv yurtimiz bazasida klaster tashkil etilishi uchun ushbu omillar turtki bo‘lgan bo‘lsa ajab emas”, — deydi Namangan pedagogika kolleji direktori Ilhomjon Nurmatov.

Maktabgacha taʼlim klasteri uchun kollejda “Ilk qadam” davlat o‘quv dasturi asosida 4 ta auditoriya va universitet maktabgacha taʼlim metodikasi kafedrasi filiali uchun joy ajratildi. Ular mukammal taʼmirdan chiqarilib, kompyuterlar, noutbuklar, videoproyektor, elektron doska bilan jihozlandi va internet tarmog‘iga ulandi.

“Ushbu auditoriyalarda viloyatdagi maktabgacha taʼlim tashkilotlari xodimlari uchun malaka oshirish kurslari tashkil etildi. Oxirgi uch oyning o‘zida 97 nafar MTT direktori, 614 nafar tarbiyachi, jami 711 nafar rahbar va xodim bu yerda malaka oshirdi. Oldinlari buning uchun Toshkentga borishga to‘g‘ri kelardi. Malaka oshirish kurslari yakunida tinglovchilar test sinovlaridan o‘tkazilib, olgan bilimlarini amalda ko‘rsatishlariga to‘g‘ri keladi.

Biz uchun yaxshi tomoni, direktorlar shu bir haftalik o‘qish davomida kollej o‘quvchilari bilan muloqotda bo‘lib, o‘zlariga kerakli kadrlarni tanlash imkoniyatiga ega bo‘lmoqda. Qolaversa, o‘quvchilarimiz amaliyot o‘tashlari uchun uzoqqa borib o‘tirishlariga hojat yo‘q”, — deydi Ilhomjon Nurmatov.

 60-maktabgacha taʼlim tashkiloti direktori Sanobar Usmanovaning qayd etishicha, klaster tashkil etilgani jamoa uchun ham qulaylik tug‘dirdi. Chunki kollej pedagoglari tarbiyachilar bilan doimiy muloqotda, bilim va malakalarini muntazam ravishda o‘rgatib borishadi. Jamoaning 50 foizdan ziyodi ham aynan shu kollej bitiruvchilari hisoblanadi.

Iroda Mashrabboyeva shunday sobiq bitiruvchilardan biri. U o‘qish payti bu yerga musiqachi sifatida ishga kirgan bo‘lsa, hozirda musiqa rahbari sifatida faoliyat olib bormoqda.

 “Klaster usulining foydasini o‘zimning misolimda yaqqol ko‘rib turibman. Kollejda o‘qib turib, yonimizdagi bog‘chada amaliyot o‘tadim, keyin ish boshladim, endi esa faoliyatim yana bir bosqichga ko‘tarildi. Malaka oshirishga to‘g‘ri kelgudek bo‘lsa ham bu yerdan uzoqqa ketishga ehtiyoj yo‘q, o‘zimizning ustozlarga yana ro‘baro‘ bo‘lamiz”, — deydi Iroda.

Xullas, Namangandagi maktabgacha taʼlim klasterida shunday gaplar. Mamlakatda tajriba-sinov tariqasida tashkil etilgan ushbu tuzilma oldinlari yangilik edi. Bugungi kunga kelib esa o‘zining ilk samaralarini ko‘rsatishga ham ulgurdi.