“Мактабгача таълим кластери олдин янгилик эди. Бугунги кунга келиб илк самараларини кўрсатишга ҳам улгурди”. “Дарё” ушбу тизимни Наманган вилояти мисолида ўрганди

Наманганда мамлакатда биринчилардан бўлиб ташкил этилган мактабгача таълим кластери муваффақиятли фаолият юритмоқда. Бу ҳақда “Дарё” мухбири Азизбек Абдувалиев хабар берди.

Мазкур кластер 2022 йил май ойида ҳукуматнинг тегишли қарори асосида Наманган педагогика коллежи базасида ташкил этилди. Бунга коллеж биноси ёнида 60-сонли мактабгача таълим ташкилоти ҳам фаолият бошлагани айни муддао бўлди.

“Олдинлари коллежимиз ёнидаги ҳудуд ташландиқ ҳолатда эди. Ваҳоланки, атрофимизда 5 километр чамаси масофада давлат мактабгача таълим муассасаси бўлмаган. Шуни инобатга олган ҳолда мутасадди раҳбарларга берилган таклифимиз жўяли деб топилиб, 2021 йили замонавий 180 ўринли боғча қад ростлади.

Қолаверса, ўзимизнинг коллеж биносида, биринчи қаватда шу боғчанинг 150 ўринли филиали ҳам ташкил этилди. Ўқув юртимиз базасида кластер ташкил этилиши учун ушбу омиллар туртки бўлган бўлса ажаб эмас”, — дейди Наманган педагогика коллежи директори Илҳомжон Нурматов.

Мактабгача таълим кластери учун коллежда “Илк қадам” давлат ўқув дастури асосида 4 та аудитория ва университет мактабгача таълим методикаси кафедраси филиали учун жой ажратилди. Улар мукаммал таъмирдан чиқарилиб, компьютерлар, ноутбуклар, видеопроектор, электрон доска билан жиҳозланди ва интернет тармоғига уланди.

“Ушбу аудиторияларда вилоятдаги мактабгача таълим ташкилотлари ходимлари учун малака ошириш курслари ташкил этилди. Охирги уч ойнинг ўзида 97 нафар МТТ директори, 614 нафар тарбиячи, жами 711 нафар раҳбар ва ходим бу ерда малака оширди. Олдинлари бунинг учун Тошкентга боришга тўғри келарди. Малака ошириш курслари якунида тингловчилар тест синовларидан ўтказилиб, олган билимларини амалда кўрсатишларига тўғри келади.

Биз учун яхши томони, директорлар шу бир ҳафталик ўқиш давомида коллеж ўқувчилари билан мулоқотда бўлиб, ўзларига керакли кадрларни танлаш имкониятига эга бўлмоқда. Қолаверса, ўқувчиларимиз амалиёт ўташлари учун узоққа бориб ўтиришларига ҳожат йўқ”, — дейди Илҳомжон Нурматов.

 60-мактабгача таълим ташкилоти директори Санобар Усманованинг қайд этишича, кластер ташкил этилгани жамоа учун ҳам қулайлик туғдирди. Чунки коллеж педагоглари тарбиячилар билан доимий мулоқотда, билим ва малакаларини мунтазам равишда ўргатиб боришади. Жамоанинг 50 фоиздан зиёди ҳам айнан шу коллеж битирувчилари ҳисобланади.

Ирода Машраббоева шундай собиқ битирувчилардан бири. У ўқиш пайти бу ерга мусиқачи сифатида ишга кирган бўлса, ҳозирда мусиқа раҳбари сифатида фаолият олиб бормоқда.

 “Кластер усулининг фойдасини ўзимнинг мисолимда яққол кўриб турибман. Коллежда ўқиб туриб, ёнимиздаги боғчада амалиёт ўтадим, кейин иш бошладим, энди эса фаолиятим яна бир босқичга кўтарилди. Малака оширишга тўғри келгудек бўлса ҳам бу ердан узоққа кетишга эҳтиёж йўқ, ўзимизнинг устозларга яна рўбарў бўламиз”, — дейди Ирода.

Хуллас, Намангандаги мактабгача таълим кластерида шундай гаплар. Мамлакатда тажриба-синов тариқасида ташкил этилган ушбу тузилма олдинлари янгилик эди. Бугунги кунга келиб эса ўзининг илк самараларини кўрсатишга ҳам улгурди.