“Har biringiz qahramonsiz” — Shavkat Mirziyoyev bir guruh tadbirkorlarga mukofotlarni topshirdi (foto)

Shavkat Mirziyoyev Tadbirkorlar kuni munosabati bilan soha vakillaridan bir guruhini mukofotlash to‘g‘risidagi farmonni imzolagandi. 18-avgust kuni ularni taqdirlash marosimi bo‘lib o‘tdi. “Daryo” muxbir ushbu marosimdan fotoreportaj tayyorladi.

Tadbir avvalida Shavkat Mirziyoyev ishbilarmonlarni ushbu bayram bilan tabriklab, o‘zining chuqur hurmati va ezgu tilaklarini bildirdi.

“Har bir mamlakatda tadbirkorlar katta kuch-qudrat bo‘lib kelgan. O‘zbekistonimizda ham iqtisodiyotni rivojlantirish, ish o‘rinlari yaratish, kambag‘allikni qisqartirish, mahallalarni obod etishga harakat qilyapmiz. Bunga eng katta hissa qo‘shayotgan kim? Tadbirkorlar! Sizlar har biringiz qahramonsiz, fidoyisiz. Biz sizlar bilan faxrlanamiz”, — dedi davlat rahbari.

Biznesga sharoitlar natijasida bu soha izchil rivojlanayotgani qayd etildi. O‘tgan bir yilda kichik tadbirkorlar soni 40 ming nafarga, o‘rta tadbirkorlar soni 2 ming nafarga, yirik korxonalar soni esa 400 taga ko‘paygan. Berilgan yengilliklardan foydalanib, bir yilda 155 ta korxonaning yillik aylanmasi 100 million dollardan oshgan. Kiritilgan yillik xorijiy sarmoyalar hajmi esa ilk bor 10 milliard dollarga yetgan.

Prezidentning 18-avgustdagi farmoniga muvofiq, O‘zbekiston iqtisodiy qudrati va aholi farovonligini yuksaltirishda namuna ko‘rsatayotgan 44 nafar fuqaro davlat mukofotlari bilan taqdirlandi. Bayram tadbirida ularga ana shu unvon, orden va medallar topshirildi.

Shuningdek, joylarda prezidentning 17-avgustdagi farmoniga muvofiq, 126 nafar ilg‘or biznesmenga “Faol tadbirkor” ko‘krak nishoni topshirilmoqda.