Livan shimoli va janubidagi yagona ikkita elektr stansiyasining faoliyati to‘xtatilganidan keyin butun mamlakatda elektr ta’minoti uzildi, deb xabar bermoqda Sky News Arabia.
16-avgust kuni Primesouth elektrostansiyasi operatori xorijiy valyutadagi qarzlar to‘lanmagani sababli elektr energiyasini o‘chirishi haqida ogohlantirgan. Gap 83 million dollar miqdoridagi mablag‘ haqida ketmoqda, Electricité du Liban (Livan elektr korporatsiyasi) shundan bor-yo‘g‘i 2 million dollarga yaqin pulni to‘lagan, deb xabar beradi Veto portali Livan teleradiokompaniyasiga tayanib.
Sky News Arabia manbalariga ko‘ra, mamlakatning davlat muassasalari, shuningdek, Bayrut xalqaro aeroporti elektr energiyasisiz qolgan. Elektr taʼminotidagi uzilish tufayli Livanning aksariyat hududlariga ichimlik suvi yetkazib beruvchi stansiyalar ishi to‘xtatildi.
2022-yilda ham Livan elektr energiyasisiz qolgandi. Bayrut yaqinidagi Aramun qishlog‘ida elektr stansiyasi bilan bog‘liq mojaro tufayli elektr ta’minoti uzilgan. U yerda mahalliy aholi elektr energiyasining muntazam uzilishiga norozilik bildirib, stansiyaga bostirib kirishga uringan. Oqibatda butun elektr tarmog‘i ishdan chiqqan. Guvohlarning xabar berishicha, Bayrut xalqaro aeroporti ham vaqtincha quvvatsizlangan.
Izoh (0)