Ukrainada 45 mingga yaqin moskvalik jang qilmoqda, dedi Moskva meri Sergey Sobyanin “Territoriya smislov” forumida.
“Bugun maxsus harbiy operatsiya zonasida 45 ming moskvalik jang qilmoqda. Ular jang hududida bo‘lib turganlarning muhim qismini tashkil etadi”, — deya Sobyaninning so‘zlarini keltiradi “Interfaks”.
Shahar merining ta’kidlashicha, gap 20 ming safarbar qilingan harbiy xizmatchilar, 20 ming shartnomasi asosidagi askar va “ko‘ngillilar” haqida ketmoqda.
“Qancha professional harbiy ketganini bilmayman, lekin menimcha, ular kamida besh ming”, — deya qo‘shimcha qildi u.
Uch hafta avval, 26 iyul-kuni Sobyanin Ukrainada 30 mingga yaqin moskvalik jang qilayotganini aytgandi. Unga ko‘ra, shulardan 10 ming nafari shartnoma asosida xizmat ko‘rsatish uchun ro‘yxatdan o‘tgan, yana 20 ming nafari safarbar etilganlar.
Rossiyada safarbarlik haqidagi qonun haliyam o‘z kuchida
Rossiyada safarbarlik 2022-yil sentabr oyining oxirida boshlandi. Oktabr oyi oxirida Mudofaa vazirligi harbiy xizmatga chaqiruv tugagani haqida xabar berdi. Mudofaa vaziri Sergey Shoyguga ko‘ra, o‘shanda 300 ming kishi safarbar qilingan. Shundan beri Rossiya hukumati Rossiyada safarbarlik yakunlanganini bir necha bor ta’kidlagan, ammo 2023-yil yanvar oyida Rossiya prezidentining matbuot kotibi Dmitriy Peskov safarbarlik farmoni amal qilishda davom etishini tasdiqladi, chunki, unga ko‘ra, safarbarlik harbiy xizmatga chaqirishdan tashqari “boshqa tadbirlarni ham o‘z ichiga oladi”.
2023-yil aprel oyida Rossiyada harbiy xizmatga majbur bo‘lgan shaxslar reyestri va onlayn chaqiruvlar to‘g‘risidagi qonun qabul qilindi, iyul oyida esa Rossiya hukumati harbiy xizmat to‘g‘risidagi qonunchilikni kuchaytiruvchi hujjatlar to‘plamini tasdiqladi. Boshqa narsalar qatorida, Rossiya harbiy xizmatga chaqirish yoshini kengaytirdi, shuningdek, zaxirada qolish muddatini oshirdi. Bundan tashqari, muddatli harbiy xizmatni o‘tayotgan askarlarga chaqiruv qog‘ozi topshirilgan paytdan boshlab xorijga chiqish taqiqlandi, harbiy xizmatga kelmaganlik uchun jarima miqdori bir necha barobar oshirildi.
Izoh (0)