Ўзбекистон ва Ҳиндистон Самарқандда замонавий саратон маркази ташкил этишни режалаштирмоқда, деб хабар берди “Дунё” АА.
Маълум қилинишича, Ўзбекистон элчихонаси, Самарқанд вилояти ҳокимлиги ва Ҳиндистоннинг Stemz Healthcare Pvt Ltd компанияси вакиллари ўртасида видеоконференсалоқа шаклида музокаралар ўтказилиб, Самарқанд шаҳрида замонавий онкология марказини барпо этиш бўйича қўшма лойиҳани амалга ошириш масалалари муҳокама қилинди.
Самарқанд вилояти ҳокими ўринбосари Рустам Қобилов турли йўналишларда, жумладан тиббиёт соҳасида самарали халқаро ҳамкорлик учун яратилган қулай муҳит ҳақида маълумот тақдим қилди. Бунда вилоят тиббиёт тизими имкониятлари, шифо масканлари ва мутахассисларнинг салоҳиятига алоҳида эътибор қаратилди.
Stemz Healthcare Pvt Ltd компанияси бошқарувчи директори Раман Содҳи ўзбекистонлик ҳамкасблар билан ҳамкорлик қилишдан манфаатдор эканини, бўлажак қўшма клиникани ташкил қилиш билан боғлиқ масалалар ўрганилаётганини маълум қилди.
Онкология маркази замонавий ва илғор технологиялар билан таъминланиши, унинг фаолиятига юқори малакали мутахассислар жалб этилиши, ўзбекистонлик тиббиётчиларнинг касб маҳоратини ошириш бўйича тизимли ишлар йўлга қўйилиши қайд этилди. Ҳинд компанияси вакилларидан иборат делегасиянинг Самарқанд шаҳрига яқин муддатларда сафарини ташкил қилиш бўйича келишиб олинди.
Бугунги кунда Самарқанд шаҳрида Zarmed Pratiksha Hospital Group Ўзбекистон—Ҳиндистон кўп тармоқли тиббиёт маркази фаолият кўрсатмоқда.
Изоҳ (0)