Vazirlar Mahkamasining tegishli qarori bilan tarixiy madaniy meros obyektlari joylashgan ko‘chalarda og‘irligi 5 tonnadan ortiq bo‘lgan yuk mashinalari harakatlanishi taqiqlanadi.
Hujjatga asosan, chiqindi to‘plash hamda ikkilamchi xomashyoni qabul qilish shoxobchalari moddiy-madaniy meros ko‘chmas mulk obyektlarining qo‘riqlanadigan chegaralaridan tashqarida joylashtiriladi.
Shuningdek, moddiy-madaniy meros ko‘chmas mulk obyektlari hududida qattiq maishiy chiqindilarni vaqtinchalik to‘plash va saqlash joylari binolar fasadining transport hamda piyoda tranzit kommunikatsiyasi ko‘rinmaydigan zonasida tashkil etiladi.
Bundan oldin Toshkent shahar IIBB tomonidan shaharda tig‘iz vaqtlarda yuk mashinalarining harakatlanishini cheklash masalasi o‘rganilayotgani to‘g‘risida xabar berilgandi. Unga ko‘ra, yuk avtomobillarining harakati ertalab soat 07:00 dan 10:00 gacha va kechki soat 17:00 dan 20:00 gacha bo‘lgan vaqt oralig‘ida cheklanishi mumkin.
2021-yil dekabrda Madaniyat vazirligi huzuridagi Madaniyat va san’atni rivojlantirish jamg‘armasi amaldagi moliyalashtirish tartibi va shtatlar soni saqlangan holda Vazirlar Mahkamasi huzuridagi Madaniyat va san’atni rivojlantirish jamg‘armasi etib qayta tashkil qilingandi.
Mazkur jamg‘arma 2017-yilning oktabrida prezident Shavkat Mirziyoyevning tegishli qarori bilan tashkil etilgandi. 2021-yilda uning mamlakat madaniy merosini asrab-avaylash bo‘yicha bir qancha loyihalari borligi aytilgandi, jumladan, knyaz Nikolay Romanovning sobiq qarorgohini rekonstruksiya qilish, zamonaviy san’at markazi, sobiq “Inturist” madaniyat va axborot markazi binosini rekonstruksiya qilish loyihasi va Toshkentdagi Respublika bolalar kutubxonasi, poytaxtdagi modernizm obyektlarini regeneratsiya qilish, shuningdek, O‘zbekiston davlat san’at muzeyining yangi binosini qurish.
Izoh (0)