Ekvadorning Esmeraldas provinsiyasidagi “Fuqarolik inqilobi” siyosiy harakati yetakchisi Pedro Briones uyi yaqinida noma’lum shaxslar tomonidan otib ketildi, deb xabar bermoqda marhum siyosatchining partiyadoshlari.
“Ekvador o‘zining eng qonli davrini boshdan kechirmoqda. Biz mafiyalar egallab olgan davlat va beparvo hukumatning ko‘ra-bila turib, bunga yo‘l qo‘yishi ortidan tovon to‘layapmiz. Ushbu zo‘ravonliklarda halok bo‘lgan hamkasbim Pedro Brionesning oilasiga hamdardlik bildiraman”, — deb yozdi “Fuqarolik inqilobi” harakatidan prezidentlikka nomzod Luis Gonsales Twitter’da.
So‘lchi siyosatchining o‘ldirilishi “Stroy” partiyasidan prezidentlikka nomzod Fernando Vilyavisensio otib ketilganidan bir hafta o‘tib sodir bo‘ldi.
9-avgust kuni kechqurun Ekvador poytaxti Kitoda noma’lum shaxslar saylovoldi tashviqoti tadbiridan so‘ng mashinaga o‘tirgan Vilyavisensioning boshiga uch marta o‘q uzdi. U tiriklik belgilarisiz klinikaga olib ketildi, so‘ng vafot etgani e’lon qilindi.
Otishmada yana to‘qqiz kishi jarohat olgan, hujumchi ham o‘ldirilgan.
Respublikada 60 kunga favqulodda holat joriy etildi. Voqeadan so‘ng prezidentlikka nomzodlarning yetti nafaridan besh nafari saylovoldi tashviqotini to‘xtatganini e’lon qildi. Biroq saylov sanasi qoldirilgani yo‘q.
20-avgust kuni Ekvadorda muddatidan oldin prezidentlik va parlament saylovlari bo‘lib o‘tadi.
Izoh (0)