Ekvador prezidentligiga nomzod Fernando Vilyavisensio poytaxt Kitodagi mitingdan so‘ng otib o‘ldirildi, deb yozmoqda El Universo.
9-avgust kuni kechqurun saylovoldi mitingi bo‘lib o‘tgan Coliseo T.V.Anderson maktabida bir guruh noma’lum shaxslar siyosatchining boshiga uch marta o‘q uzdi. Vilyavisensio tiriklik belgilarisiz klinikaga olib ketildi, so‘ng vafot etgani e’lon qilindi.
Guvohlarning so‘zlariga ko‘ra, hodisa joyida juda ko‘p o‘q ovozlari eshitilgan, shundan so‘ng og‘ir yaralangan Vilyavisensio yiqilgan. Otishma oqibatida jami sakkizga yaqin kishi jarohatlangan, deb xabar beradi manbalar.
Expreso nashrining yozishicha, Vilyavisensio politsiya tomonidan ajratilgan mashinaga o‘tirgan paytda otib o‘ldirilgan. U politsiya himoyasiga olingan nomzodlardan biri edi. Bir hafta oldin siyosatchi unga nisbatan turli tahdidlar bo‘layotgani haqida xabar bergan.
Ekvador prezidenti Gilermo Lasso Vilyavisensio oilasiga hamdardlik bildirdi.
“Prezidentlikka nomzod Fernando Vilyavisensioning o‘ldirilishidan g‘azablandim va hayratda qoldim. Uning rafiqasi va qizlariga hamdardlik bildiraman”, — deb yozdi u Twitter’da. Davlat rahbari bu jinoyatni jazosiz qoldirmaslikka va’da berdi.
Lasso Milliy saylov kengashi rahbari, bosh prokuror, Milliy sud rahbari va boshqa hukumat amaldorlari bilan favqulodda yig‘ilish o‘tkazdi.
Qotillikda gumonlanuvchi qo‘lga olindi
Keyinroq mamlakat Bosh prokuraturasi xabar berilishicha, xavfsizlik kuchlari Vilyavisensioning o‘ldirilishida gumonlangan shaxsni qo‘lga olgan.
Gumonlanuvchi xavfsizlik xodimlari tomonidan yarador qilingan. Erkak qo‘lga olinib, prokuraturaning Og‘ir jinoyatlarga qarshi kurashish boshqarmasiga olib ketildi. Keyinchalik u olgan jarohatlari tufayli vafot etgan.
Ma’lumot uchun Vilyavisensio 59 yoshda edi, u Construye harakatidan prezidentlikka nomzod bo‘lgan. Siyosatchi korrupsiyaga qarshi kurashgan. U Chimboraso provinsiyasidagi Alausi kantonida tug‘ilgan, keyin uning oilasi Kitoga ko‘chib o‘tgan. 2021—2023-yillarda Vilyavisensio parlament nazorati qo‘mitasiga raislik qilgan.
May oyida Lasso Ekvador Milliy Assambleyasini tarqatib yubordi va muddatidan oldin saylovlar o‘tkazilishini e’lon qildi. 20-avgust kuni Ekvadorda prezident, vitse-prezident va parlament saylanadi.
Izoh (0)