Ozarbayjon Tashqi ishlar vazirligi arman tomonini harbiy texnika va qurollarni umumiy chegarada jamlaganlikda aybladi, Yerevan bu ayblovlar haqiqatga to‘g‘ri kelmasligini aytdi. Bu haqda “RIA Novosti” xabar berdi.
Ozarbayjon TIVga ko‘ra, so‘nggi kunlarda davlat chegarasida “navbatdagi harbiy avantyurani amalga oshirish” maqsadida Armaniston Qurolli kuchlarining ko‘p sonli qurol-yarog‘, harbiy texnika va shaxsiy tarkibi to‘plangan.
“Armaniston tomonidan Ozarbayjon suveren hududlarida noqonuniy joylashtirilgan radioelektron urush uskunalaridan foydalanish alohida tashvish uyg‘otadi. So‘nggi haftalarda ‘Ozarbayjon havo yo‘llari’ aviakompaniyasining fuqarolik samolyotlari bilan bir qatorda xorijiy davlatlarning aviatexnikalari ham xavfsizlikka jiddiy tahdid soluvchi radioelektron shovqinlarga duchor bo‘ldi”, — dedi Ozarbayjon TIV.
Armaniston nima demoqda?
O‘z navbatida Armaniston Mudofaa vazirligi mazkur bayonotni rad etdi.
“Ozarbayjon Tashqi ishlar vazirligining Armaniston chegarasida ko‘p sonli qurol-yarog‘, harbiy texnika va shaxsiy tarkibni to‘plagani haqidagi xabar haqiqatga to‘g‘ri kelmaydi”, — deyiladi vazirlik bayonotida.
Bundan tashqari, vazirlik Armanistonning Tog‘li Qorabog‘da qo‘shinlari yo‘qligini qayd etdi.
Izoh (0)