Эквадорнинг Эсмералдас провинциясидаги “Фуқаролик инқилоби” сиёсий ҳаракати етакчиси Педро Брионес уйи яқинида номаълум шахслар томонидан отиб кетилди, деб хабар бермоқда марҳум сиёсатчининг партиядошлари.
“Эквадор ўзининг энг қонли даврини бошдан кечирмоқда. Биз мафиялар эгаллаб олган давлат ва бепарво ҳукуматнинг кўра-била туриб, бунга йўл қўйиши ортидан товон тўлаяпмиз. Ушбу зўравонликларда ҳалок бўлган ҳамкасбим Педро Брионеснинг оиласига ҳамдардлик билдираман”, — деб ёзди “Фуқаролик инқилоби” ҳаракатидан президентликка номзод Луис Гонсалес Twitter’да.
Сўлчи сиёсатчининг ўлдирилиши “Строй” партиясидан президентликка номзод Фернандо Вилявисенсио отиб кетилганидан бир ҳафта ўтиб содир бўлди.
9 август куни кечқурун Эквадор пойтахти Китода номаълум шахслар сайловолди ташвиқоти тадбиридан сўнг машинага ўтирган Вилявисенсионинг бошига уч марта ўқ узди. У тириклик белгиларисиз клиникага олиб кетилди, сўнг вафот этгани эълон қилинди.
Отишмада яна тўққиз киши жароҳат олган, ҳужумчи ҳам ўлдирилган.
Республикада 60 кунга фавқулодда ҳолат жорий этилди. Воқеадан сўнг президентликка номзодларнинг етти нафаридан беш нафари сайловолди ташвиқотини тўхтатганини эълон қилди. Бироқ сайлов санаси қолдирилгани йўқ.
20 август куни Эквадорда муддатидан олдин президентлик ва парламент сайловлари бўлиб ўтади.
Изоҳ (0)