Ekvadorda Manta shahri meri Agustin Intriago qurilish obyektini ko‘zdan kechirayotganda uyushtirilgan hujum natijasida otib o‘ldirildi, deya xabar bermoqda BBC News.
Shuningdek, hujum vaqtida merning yonida bo‘lgan mahalliy futbolchi Ariana Estefaniya Chankay ham halok bo‘ldi.
Politsiya hozircha hujum qilgan shaxsning motivini aniqlagani yo‘q, biroq avvalroq merga bir necha marta tahdid qilinganini tasdiqladi.
Rasmiylarning aytishicha, Agustin Intriagoga o‘g‘irlangan pikapda kelgan qurolli shaxs tomonidan bir necha marta o‘q uzilgan. U olgan jarohatlari oqibatida shifoxonada vafot etgan.
Hujum paytida u yangi kanalizatsiya tizimi qurilayotgan qurilish maydonchasini ko‘zdan kechirayotgandi. Las Dragonas klubining 29 yoshli futbolchisi Ariana Chankay esa o‘sha paytda merning yoniga kelib, havaskor jamoani qo‘llab-quvvatlashni so‘rayotgan bo‘lgan.
Pikap mashinasi haydovchisi quvish paytida yaralangan va hibsga olingan, ammo o‘q uzgan shaxs qochib ketishga muvaffaq bo‘lgan.
Shahar meri fevral oyida ikkinchi marta to‘rt yillik muddatga saylangan edi.
Bu qotillik Ekvadorni larzaga soldi, u yerda yaqin vaqtgacha saylangan amaldorlarga hujumlar kam uchrardi.
Fevral oyida Puyerto Lopes merligi uchun kurashayotgan siyosatchi saylov uchastkalari ochilishidan bir necha soat oldin o‘ldirilgan edi.
Izoh (0)