IIV Tezkor-qidiruv departamenti tomonidan chet el fuqarosining sir saqlanishi lozim bo‘lgan video tasvirlarini tarqatish bilan qo‘rqitib, pul talab qilib kelayotgan shaxs qo‘lga olindi. Bu haqda IIV matbuot xizmati xabar berdi.
Qayd etilishicha, O‘zbekistondagi xorijiy korxona rahbari bo‘lgan Janubiy Koreya fuqarosiga o‘zining qo‘l ostida ishlagan o‘zbekistonlik 2023-yil mart oyidan buyon hayoti va sog‘lig‘iga tahdid qilib kelgan.
U inson qadr-qimmatini kamsitish va sir saqlanishi lozim bo‘lgan ma’lumotlarni qo‘lga kiritib, ushbu videolarni oilasiga, tanishlari va ish joyiga tarqatish bilan qo‘rqitib, rejalashtirgan investitsiya loyihalariga ta’sir etishini aytib, shu kunga qadar tovlamachilik yo‘li bilan 11,3 million so‘m hamda 1,2 ming dollar pul olgan. Shu bilan birga, u videolarni tarqatmaslik evaziga 10 ming dollar talab qilib kelgan.
Toshkent shahar Bektemir tumanida o‘tkazilgan tezkor tadbirda gumonlanuvchiga Janubiy Koreya fuqarosi tomonidan 600 dollar va 300 ming so‘m pulni birga ishlagan sherigi orqali berilgan vaqtida ashyoviy dalillar bilan qo‘lga olingan.
Hozirda holat yuzasidan Bektemir tumani IIO FMB tergov bo‘limi tomonidan Jinoyat kodeksining 165-moddasi (tovlamachilik) bilan jinoyat ishi qo‘zg‘atilib, tergov harakatlari olib borilmoqda.
O‘zgalarning shaxsiy ma’lumotlarni tarqatish orqali pul undirish holatlari
- Iyul oxirlarida Buxoro shahrida erkak bilan ishqiy munosabatda bo‘lib, uni turmush o‘rtog‘iga oshkor qilmaslik evaziga telefon talab qilgan qiz qo‘lga olingandi.
- May oyida Toshkentda ayolning foto-videolarini eri va qaynotasiga ko‘rsatishini aytib, undan pul talab qilgan erkak ushlangani,
- Toshkent viloyatida 19 yoshli qizning suratlarini tarqatish bilan tahdid qilgan yigit qo‘lga tushgani to‘g‘risida xabar berilgandi.
Izoh (0)