ИИВ Тезкор-қидирув департаменти томонидан чет эл фуқаросининг сир сақланиши лозим бўлган видео тасвирларини тарқатиш билан қўрқитиб, пул талаб қилиб келаётган шахс қўлга олинди. Бу ҳақда ИИВ матбуот хизмати хабар берди.
Қайд этилишича, Ўзбекистондаги хорижий корхона раҳбари бўлган Жанубий Корея фуқаросига ўзининг қўл остида ишлаган ўзбекистонлик 2023 йил март ойидан буён ҳаёти ва соғлиғига таҳдид қилиб келган.
У инсон қадр-қимматини камситиш ва сир сақланиши лозим бўлган маълумотларни қўлга киритиб, ушбу видеоларни оиласига, танишлари ва иш жойига тарқатиш билан қўрқитиб, режалаштирган инвестиция лойиҳаларига таъсир этишини айтиб, шу кунга қадар товламачилик йўли билан 11,3 миллион сўм ҳамда 1,2 минг доллар пул олган. Шу билан бирга, у видеоларни тарқатмаслик эвазига 10 минг доллар талаб қилиб келган.
Тошкент шаҳар Бектемир туманида ўтказилган тезкор тадбирда гумонланувчига Жанубий Корея фуқароси томонидан 600 доллар ва 300 минг сўм пулни бирга ишлаган шериги орқали берилган вақтида ашёвий далиллар билан қўлга олинган.
Ҳозирда ҳолат юзасидан Бектемир тумани ИИО ФМБ тергов бўлими томонидан Жиноят кодексининг 165-моддаси (товламачилик) билан жиноят иши қўзғатилиб, тергов ҳаракатлари олиб борилмоқда.
Ўзгаларнинг шахсий маълумотларни тарқатиш орқали пул ундириш ҳолатлари
- Июль охирларида Бухоро шаҳрида эркак билан ишқий муносабатда бўлиб, уни турмуш ўртоғига ошкор қилмаслик эвазига телефон талаб қилган қиз қўлга олинганди.
- Май ойида Тошкентда аёлнинг фото-видеоларини эри ва қайнотасига кўрсатишини айтиб, ундан пул талаб қилган эркак ушлангани,
- Тошкент вилоятида 19 ёшли қизнинг суратларини тарқатиш билан таҳдид қилган йигит қўлга тушгани тўғрисида хабар берилганди.
Изоҳ (0)