Ижтимоий тармоқда Андижон вилоятида 21 ёшли аёл ўзини осиб ўлдиргани ҳақидаги хабарлар тарқалди. Олий суд матбуот хизмати ҳолат юзасидан терговга қадар текширув ҳаракатлари олиб борилаётганини маълум қилди.
Аниқланишича, 15 июль куни вилоятнинг Олтинкўл туманида яшаган 21 ёшли келин С.О. ўз жонига қасд қилган. Судга оид тиббий экспертизанинг дастлабки маълумотномасига кўра, унда бўйин аъзоларини сиртмоқ билан сиқилиши натижасида юзага келган механик асфиксия, ўпка виссерал плевра варақлари ости ва юрак эпикард ости соҳаларига қон қуйилиши, бўйин соҳасидаги странгулясион эгат шилинма, бош пешона ва чап қулоқ супраси атрофида шилинма кўринишидаги жароҳатлар мавжудлиги кўрсатилган. Шунингдек, мазкур ҳолат юзасидан суд-психология экспертизаси тайинланган.
Марҳуманинг отасининг “Газета.уз”га маълум қилишича, у қизининг ўзини ўзи ўлдирганига ишонмайди. “Фарзандим ўзини захарлаши ва жароҳат етказишига умуман ишонмайман, бу ақлга сиғмайдиган маълумот. Фарзандларимнинг барчасини иродали қилиб тарбиялаганман. Олти йил давомида фарзандсизлик доғида юриб, қизимни тилаб олгандим”, — деган қизнинг отаси.
Унинг сўзларига кўра, 2020 йилда турмушга чиққан қизи 2021 йилда ўғил фарзанд кўрган. Чақалоқ ҳомиланинг саккизинчи ойида, яъни муддатидан олдин эрта туғилгани сабабли уни даволатиш пайтида харажатлар кўпайган. Шундан кейин қудалар ўртасига совуқчилик тушишни бошлаган. Қиз қайнонаси ва қайнакасидан кўп шикоят қилган.
Олий суд матбуот хизмати хабарида келтирилишича, ҳозирда туман прокуратураси томонидан терговга қадар текширув ҳаракатлари олиб борилмоқда, натижаси бўйича қонуний қарор қабул қилиниши таъминланади.
Терговга қадар текширув жараёнлари вилоят прокуратураси томонидан назоратга олинган.
Изоҳ (0)