Ijtimoiy tarmoqlarda Hindistonning yo‘tal va shamollashga qarshi yana bir siropi — Cold Out tarkibida toksinlar topilgani sabab JSST uning xavfidan ogohlantirgani haqida xabarlar tarqaldi. Farmatsevtika mahsulotlari xavfsizligi markazi ushbu dori O‘zbekistonda ro‘yxatdan o‘tmaganini ma’lum qilib, fuqarolardan xavotirga tushmasliklarini so‘radi.
JSST maʼlumotlariga ko‘ra, Cold Out siropi Fourrts Laboratories (Hindiston) tomonidan Dabilife Pharma uchun ishlab chiqarilgan bo‘lib, uning tarkibida toksinlar borligi qayd etilgan.
Shuningdek, Hindiston Sog‘liqni saqlash vazirligi maʼlumotiga ko‘ra, mazkur dori vositasi Iroqda o‘tkazilgan alohida sinovlarda muvaffaqiyatsizlikka uchragach, erkin savdodan qaytarib olingan.
Farmatsevtika mahsulotlari xavfsizligi markazining bildirishicha, Hindistonning Fourrts Laboratories tomonidan ishlab chiqarilgan mazkur dori vositasi O‘zbekistonda davlat ro‘yxatidan o‘tkazilmagan. “Dori vositalari va farmatsevtika faoliyati to‘g‘risida”gi O‘zbekiston qonuniga muvofiq, dori vositalarining, tibbiy buyumlarning va tibbiy texnikaning tibbiyot amaliyotida qo‘llanilishiga, qoida tariqasida, ular davlat ro‘yxatidan o‘tkazilgandan keyin ruxsat etiladi.
Xabarda qo‘shimcha qilinishicha, 2023-yil fevral oyidan boshlab O‘zbekistonda ishlab chiqarilayotgan va mamlakatga kirib kelayotgan sirob shakldagi dori vositalari tarkibi dietilenglikol (DEG) va etilenglikol (EG) zaharli moddalari bo‘yicha chuqur tekshirilib, Sog‘liqni saqlash vazirligi tomonidan bu borada qatʼiy nazorat o‘rnatilgan.
Izoh (0)