Ижтимоий тармоқларда Ҳиндистоннинг йўтал ва шамоллашга қарши яна бир сиропи — Cold Out таркибида токсинлар топилгани сабаб ЖССТ унинг хавфидан огоҳлантиргани ҳақида хабарлар тарқалди. Фармацевтика маҳсулотлари хавфсизлиги маркази ушбу дори Ўзбекистонда рўйхатдан ўтмаганини маълум қилиб, фуқаролардан хавотирга тушмасликларини сўради.
ЖССТ маълумотларига кўра, Cold Out сиропи Fourrts Laboratories (Ҳиндистон) томонидан Dabilife Pharma учун ишлаб чиқарилган бўлиб, унинг таркибида токсинлар борлиги қайд этилган.
Шунингдек, Ҳиндистон Соғлиқни сақлаш вазирлиги маълумотига кўра, мазкур дори воситаси Ироқда ўтказилган алоҳида синовларда муваффақиятсизликка учрагач, эркин савдодан қайтариб олинган.
Фармацевтика маҳсулотлари хавфсизлиги марказининг билдиришича, Ҳиндистоннинг Fourrts Laboratories томонидан ишлаб чиқарилган мазкур дори воситаси Ўзбекистонда давлат рўйхатидан ўтказилмаган. “Дори воситалари ва фармацевтика фаолияти тўғрисида”ги Ўзбекистон қонунига мувофиқ, дори воситаларининг, тиббий буюмларнинг ва тиббий техниканинг тиббиёт амалиётида қўлланилишига, қоида тариқасида, улар давлат рўйхатидан ўтказилгандан кейин рухсат этилади.
Хабарда қўшимча қилинишича, 2023 йил февраль ойидан бошлаб Ўзбекистонда ишлаб чиқарилаётган ва мамлакатга кириб келаётган сироб шаклдаги дори воситалари таркиби диэтиленгликол (DEG) ва этиленгликол (EG) заҳарли моддалари бўйича чуқур текширилиб, Соғлиқни сақлаш вазирлиги томонидан бу борада қатъий назорат ўрнатилган.
Изоҳ (0)