Ўзбекистонда вилоят ва туман (шаҳар) даражасидаги ҳокимликлар вазифаси ва функцияларининг аниқ чегараси белгиланади. Бу ҳақда жамоатчилик муҳокамаси учун эълон қилинган “Ўзбекистон-2030” стратегияси лойиҳасида кўзда тутилган.
Унга кўра, ҳокимликлар ва вазирликлар бўлинмаларининг бир-бирини такрорловчи 70 дан ортиқ функциялари оптималлаштирилади. Ҳокимликларга юклатилган 500 дан ортиқ вазифалар орасидан улар фаолиятига хос бўлмаганлари бекор қилинади.
Маҳаллий ижро ҳокимияти органларини демократик тамойиллар асосида шакллантириш, шу жумладан, ҳокимларни сайлаш тизимини жорий этиш ва уларни муддатидан олдин лавозимидан озод этишнинг ҳуқуқий асослари яратилади.
Ҳокимликларнинг ҳудудий ижро органлари штат бирлиги ва тузилмаларини белгилашдаги роли оширилиб, ҳудудларда амалга ошириладиган вазифалар (функциялар) бўйича “ваколатлар реестри” шакллантирилади.
Бундан ташқари, ҳокимларнинг маҳаллий кенгашга раҳбарлик қилиш амалиёти тўлиқ бекор қилиниб, кенгаш раисининг ҳуқуқий мақоми, асосий вазифа ва функциялари ҳамда жавобгарлик доираси аниқ белгиланади. Ҳудуддаги аҳоли сонидан келиб чиқиб ҳар бир маҳаллий кенгашда 5 тагача доимий асосда фаолият юритувчи профессионал депутатлар корпуси шакллантирилади. Маҳаллий кенгашларнинг 300 дан ортиқ функциялари қайта кўриб чиқиб, ўзига хос бўлмагани бекор қилинади.
Изоҳ (0)