Rossiyaning Ukrainaga keng ko‘lamli bosqini boshlanganidan beri Yevropa kompaniyalarining Rossiyadagi faoliyati bilan bog‘liq to‘g‘ridan to‘g‘ri yo‘qotishlari kamida 100 milliard yevroni tashkil etdi. Bu haqda Financial Times 600 ta eng yirik kompaniyaning moliyaviy hisobotiga tayanib xabar bermoqda.
Nashrning yozishicha, Yevropaning 176 ta kompaniyasi o‘z aktivlarining amortizatsiyasi, “birja bilan bog‘liq xarajatlar”, shuningdek, biznesni sotish, yopish yoki qisqartirish bilan bog‘liq xarajatlarga duch kelgan.
Eng katta yo‘qotishlar, deb yozadi FT, energetika korxonalarida kuzatilgan. Xususan, BP, Shell va TotalEnergies jami 40,6 milliard yevro zarar ko‘rgan. Biroq neft va gaz narxining yuqoriligi ortidan bu kompaniyalar zararni foyda bilan qoplashga muvaffaq bo‘lgan.
Shuningdek, moliya kompaniyalari, jumladan banklar, sug‘urta va investitsiya kompaniyalari katta zarar ko‘rdi – ular 17 yarim milliard yevroga yaqin yo‘qotdi. Avtomobil ishlab chiqaruvchilari 13,6 milliard yevro miqdorida zarar ko‘rdi.
Nashrning yozishicha, eng ko‘p zarar ko‘rgan Yevropa kompaniyalari Britaniyaga qarashli bo‘lib, ular 30 milliard yevrodan ortiq yo‘qotgan. Ikkinchi va uchinchi o‘rinlarni 40 milliard yevrodan ko‘p zarar ko‘rgan nemis va fransuz firmalari egalladi. Italiya, Irlandiya va Daniya kompaniyalari ham katta yo‘qotishlarga uchradi.
Rossiyaning Ukrainaga keng ko‘lamli bosqini ortidan ko‘plab xorijiy kompaniyalar Rossiya bozoridagi faoliyatini to‘xtatdi yoki mamlakatni tark etdi.
Kiyev Iqtisodiyot maktabi ma’lumotlariga ko‘ra, 260 dan ortiq G‘arb kompaniyasi Rossiya Federatsiyasini butunlay tark etgan, 700 dan ortig‘i o‘z faoliyatini to‘xtatgan, 1 400 ga yaqini esa avvalgidek ishlashda davom etmoqda.
Izoh (0)