Dunyo davlatlari yadro qurolidan butunlay voz kechishi kerak, dedi Birlashgan Millatlar Tashkiloti bosh kotibi Antoniu Guterrish Yaponiyada Xirosimaga bomba tashlanganiga 78 yil to‘lishi munosabati bilan o‘tkazilgan xotira tadbiriga yo‘llagan murojaatida.
“Sovuq urush davrida dunyoga xavf solgan yadro soyasi yana paydo bo‘ldi”, — deb xatni o‘qib berdi Guterrishning qurolsizlanish bo‘yicha o‘rinbosari Izumi Nakamitsu.
Guterrish o‘z murojaatida baʼzi davlatlar “yadro qilichini beparvolik bilan o‘ynatishda” davom etayotganini taʼkidladi. BMT rahbari barcha davlatlarni yadroviy qurolsizlanishni yakuniga yetkazishga chaqirdi va buni tashkilotning asosiy maqsadi deb atadi.
Shu bilan birga, Guterrish 78 yil avval atom bombasini kim portlatgani va hozirda qaysi davlatlar yadroviy qurolga ega ekani haqida so‘z ochmagan.
Ikkinchi jahon urushi yakunida Yaponiyaning Xirosima va Nagasaki shaharlarida AQSH Qurolli kuchlari tomonidan atom bombalari sinovdan o‘tkazilgan. Bomba 6-avgustda Xirosimaga, 9-avgustda Nagasakiga tashlangan. Ushbu portlashlar insoniyat tarixida yadro qurolidan foydalanish bo‘yicha yagona hodisa bo‘ldi, uning oqibatida esa 200 mingga yaqin odam halok bo‘ldi.
Izoh (0)