Yaponiya avgust oyi oxirida Fukusima-1 atom elektr stansiyasidagi (AES) suvni Tinch okeaniga to‘kishni boshlaydi, deb yozmoqda The Guardian.
Yaponiya bosh vaziri Fumio Kisida AQSHga safaridan keyin vazirlar yig‘ilishida AESdagi suvni chiqarib tashlash bo‘yicha qaror qabul qilishi kutilmoqda, deb yozadi gazeta.
Kisida 18-avgust kuni Vashingtonda bo‘lib o‘tadigan Yaponiya—AQSH—Janubiy Koreya sammitida AQSH prezidenti Jo Bayden va Janubiy Koreya yetakchisi Yun Sok Yol bilan muzokaralar o‘tkazishni rejalashtirgan. Shundan keyin rasmiy qaror qabul qilingach, suvni oqizishga tayyorlash uchun taxminan bir hafta vaqt ketadi. Bundan kelib chiqilsa, jarayon avgust oxirida boshlanadi, deydi nashr manbalari.
Xitoy Fukusima AESdagi suvni okeanga to‘kishga qarshi
2011-yildagi zilzila va sunami oqibatida yuzaga kelgan avariyadan so‘ng Fukusima AES hududida shikastlangan reaktorlarni sovutishda foydalaniladigan 1 000 dan ortiq suv rezervuarlari to‘planib qolgan, bu taxminan 1,3 million kub metr suvni tashkil etadi. Yaponiya rasmiylariga ko‘ra, 2024-yil boshida barcha rezervuarlar to‘lib bo‘ladi.
Ularda saqlanadigan suv yaxshilab tozalangan, ammo unda hali ham vodorodning radioaktiv izotopi — tritiy bor, bu modda izsiz yo‘qolib ketmaydi. Yaponiya hukumati bu suvni dengizga to‘kish zarurligini aytib, bu dunyoning boshqa atom elektr stansiyalarida ham odatiy hol ekanini ta’kidlamoqda.
Xitoy AESdagi suvni okeanga to‘kishga qat’iyan qarshi. Xitoy elchisi bu dasturni noto‘g‘ri deb atadi hamda Yaponiya dasturni to‘xtatib, birinchi navbatda qo‘shni davlatlar bilan maslahatlashuvlar o‘tkazishi kerakligini aytdi. 4-iyul kuni Atom energiyasi bo‘yicha xalqaro agentlik (MAGATE) rahbari Rafael Grossi Yaponiyaga tashrif buyurdi va suvni okeanga to‘kish qarorini ma’qulladi. Uning ta’kidlashicha, oqindi suv sifatiga, baliqlarga va yaqin atrofdagi manzilgohlarga katta ta’sir qilmaydi.
Izoh (0)