Misrdan C gepatitiga qarshi dori vositalarining o‘n ikkinchi partiyasi 5-avgust kuni O‘zbekistonga yetkazildi, deb xabar bermoqda “Dunyo” AA.
Ma’lum qilinishicha, umumiy 30 dona qutiga yuklangan 7,2 ming “Sofosbuvir-400 mg” dori vositalari O‘zbekiston Sog‘liqni saqlash vazirligi huzuridagi Virusologiya ilmiy-tekshirish instituti tomonidan shifotalab bemorlarga taqsimlanadi.
Mutaxassislarning fikricha, Misrning C gepatitiga qarshi kurashdagi beg‘araz yordami davlat budjetidan ajratilgan 35 milliard so‘mni tejash imkonini berdi. Natijada ushbu mablag‘lar gepatitni aniqlash bo‘yicha aholini “skrining” qilish hajmini joriy 10 mingdan 1 millionga qadar oshirish, yashiringan viruslarni aniqlab, kasallikka to‘liq barham berishga imkon yaratishi mumkin.
Ushbu tadbir prezidentning 2023-yil 20—21-fevral kunlari Misrga rasmiy tashrifi hamda ikki mamlakat sog‘liqni saqlash vazirliklari o‘rtasida o‘tkazilgan muzokaralar chog‘ida tuzilgan shartnomalarga muvofiq amalga oshirilmoqda.
Ta’kidlanishicha, faqat aholini ommaviy tekshirish va gepatitga qarshi doimiy kurash natijasida ushbu kasallikka 2030-yilga kelib chek qo‘yish mumkin.
Ushbu dori vositalarini yetkazib berish 29-aprel kuni boshlangandi. 23-iyul kuni dorilarning 11-partiyasi yetkazib berildi.
Izoh (0)