O‘zbekistondagi texnikumlarda ham kredit-modul tizimini joriy etish rejalashtirilmoqda. Bu haqda jamoatchilik muhokamasi uchun e’lon qilingan “O‘zbekiston-2030” strategiyasi loyihasida ko‘zda tutilgan.
Hujjatga ko‘ra, bu bo‘yicha Vazirlar Mahkamasi qarori loyihasi ishlab chiqiladi.
Ta’limning kredit-modul tizimi joriy etiladigan ta’lim tashkilotlar ro‘yxati, o‘quv jarayoniga kredit-modul tizimini joriy etishda ta’lim dasturi, fanlar katalogi, akademik mobillik, ta’lim to‘g‘risidagi ma’lumotnoma, kreditlarni tan olish va ko‘chirib o‘tkazishga taalluqli hujjatlar tasdiqlanadi.
Shuningdek, texnikumlarning o‘quv yuklamasi va o‘quvchi tomonidan bir o‘quv yilida to‘planadigan kreditlar hajmi, o‘quvchilarning o‘zlashtirishini baholash tartibi belgilanadi.
Kredit-modul tizimida o‘qiydigan o‘quvchilarni o‘qishdan chetlashtirish, qayta tiklash, kursdan kursga o‘tkazish tartibi ishlab chiqiladi.
Ushbu hujjat loyihasi muhokamasi 15-avgustgacha davom etadi.
Kredit-modul tizimi bu taʼlimni tashkil etish jarayoni bo‘lib, o‘qitishning modul texnologiyalari jamlamasi va kredit o‘lchovi asosida baholash modeli hisoblanadi. “O‘zbekiston Respublikasi oliy ta'lim tizimini 2030-yilgacha rivojlantirish konsepsiyasi”ga ko‘ra, mamlakatdagi OTMlarning 85 foizini 2030-yilgacha bosqichma-bosqich kredit-modul tizimiga o‘tkazish belgilangandi.
Izoh (0)