Milliarder Ilon Mask Meta asoschisi Mark Sukerbergga qarshi jangga tayyorlanayotganini aytdi. U X (Twitter’ning yangi nomi) ijtimoiy tarmog‘ida tegishli tvitni qoldirdi.
“Sukerberg va Mask o‘rtasidagi jang X tarmog‘ida jonli efirda namoyish etiladi. Barcha kelib tushgan mablag‘lar xayriya jamg‘armalariga yo‘naltiriladi",— degan Mask.
Shuningdek, milliarder jangga hozirlik ko‘rayotganini ham qo‘shimcha qilgan.
“Men kun davomida og‘irlik ko‘taraman, jangga tayyorlanaman. Ular bilan shug‘ullanishga alohida vaqtim yo‘q, shuning uchun ularni ishxonaga olib kelaman”, — degan Mask.
Milliarderlar jangi
Sukerberg Twitter’ga (hozirda X) raqobatchi Threads tarmog‘ini ishga tushirgach, Mask Meta asoschisiga qarshi jang e’lon qildi. Ya’ni 51 yoshli Mask havaskorlar o‘rtasidagi braziliyacha jiu-jitsu turnirida g‘olib chiqqan 39 yoshli Sukerbergni “qafasdagi jang”ga chaqirdi.
Sukerberg chaqiriqni qabul qilib, jang bo‘ladigan manzilni jo‘natishni so‘ragan. Maskning onasi Mey Mask Meta korporatsiyasi rahbari Mark Sukerberg bilan o‘g‘li o‘rtasidagi jangni bekor qilganini aytgan. U tomonlar o‘rtasidagi bahs gap orqali hal bo‘lishini ilgari surgan.
Ilon Mask uni jangga UFC sobiq chempioni Habib Nurmagomedov tayyorlashini xohlagan. Biroq Habib mazkur taklifni rad etgan, sababi esa ochiqlanmagan.
Izoh (0)