Varshava Belarus chegarasi yaqinida tobora ko‘proq qo‘shin joylashtirmoqda.
Polsha hukumati mamlakatni himoya qilish uchun Belarus bilan chegarani butunlay yopish imkoniyatini ko‘rib chiqmoqda. Bu Belarus Respublikasi hududida “Vagner” yollanma askarlarining mavjudligi bilan bog‘liq.
“Biz hududimizni himoya qilish, fuqarolarimizni asrash uchun zarur bo‘ladigan har qanday qadamlarni, jumladan, Belarusni to‘liq izolyatsiya qilish, chegarani to‘liq yopishni ko‘rib chiqyapmiz”, — dedi Polsha tashqi ishlar vaziri o‘rinbosari Pavel Yablonskiy CNN telekanaliga bergan intervyusida.
Uning so‘zlariga ko‘ra, chegarani yopish Polsha chetlab o‘tmoqchi bo‘lgan so‘nggi chora bo‘ladi, ammo hujumlar va ziddiyatlar davom etsa, Varshavaning boshqa chorasi qolmaydi.
Rasmiy vakilning qayd etishicha, Belarusdan kelayotgan tahdid jiddiy bo‘lib, “vagnerchilar” Belarus orqali Polsha hududiga kirishga harakat qilishgan..
“Biz chegaramizda yangi hujumlar, havo hududimizni buzishga yangi urinishlar bo‘lishini kutmoqdamiz”, — dedi Yablonskiy.
Uning qo‘shimcha qilishicha, “ular o‘zlari xohlagan narsani qila olishlarini ko‘rsatishga harakat qilishadi”. Bunga javoban Polsha Belorussiya chegarasi yaqinida tobora ko‘proq qo‘shinlarini joylashtirmoqda.
