Twitter’ning yangi egasi Ilon Mask jang san’atlari ishqibozi bo‘lgan Meta bosh direktori Mark Sukerberg bilan jang qilishga tayyorligini ma’lum qilgan.
![](/static/_130173744_fight-index-getty.jpg)
Meta’ga tegishli Instagram Twitter’ga raqobatdosh bo‘ladigan, matnga asoslangan ijtimoiy tarmoq yaratish rejalari haqidagi xabar berganidan so‘ng, 51 yoshli Mask yaqinda havaskorlar o‘rtasidagi braziliyacha jiu-jitsu turnirida g‘olib chiqqan 39 yoshli Sukerbergni “qafasdagi jang”ga chaqirdi.
![](/static/photo_2023-06-22_15-18-47.jpg)
Mask seshanba kuni Twitter’ga o‘zining yosh raqibini Meta kompaniyasiga tegishli yangi platformaga hech qanday imkoniyat qoldirmasligi haqida ogohlantirib, izoh qoldirgan.
Foydalanuvchilardan biri Maskka: “Yaxshisi, ehtiyot bo‘l, u jiu-jitsu bilan shug‘ullanayotgani haqida eshitdim”, — deya yozib qoldirgan.
Bunga javoban tadbirkor: “Agar shunaqa bo‘lsa, u bilan qafasda jang qilishga tayyorman”, — deb javob qaytardi.
Ilon Mask 2022-yil Jo Rogan bilan bo‘lgan podkastda bolaligida kiokushin karate, taekvondo, dzyudo va braziliyacha jiu-jitsu bilan shug‘ullanganini aytib o‘tgandi.
![](/static/f9f9b2e524c968274607ffc3e5bc3.jpeg)
Shuningdek, Mask sumo jangchisiga qarshi sparringga chiqqan suratini ham ulashgan. “Uni uloqtirishga muvaffaq bo‘ldim, lekin buning evaziga 8 yillik bel og‘rig‘ini orttirib oldim”, — ushbu suratga izoh berarkan Ilon.
![](/static/a40ec33244111867f52ab8be76c4d.jpeg)
Sukerberg esa Lex Fridman bilan bo‘lib o‘tgan podkastda jiu-jitsuni o‘rganayotgan vaqtda, hatto, kaltaklanishga ham tayyor bo‘lganini ta’kidlagan.
![](/static/83fd411664e208b5662f92be5b9c6.jpeg)
Mark o‘z Instagram sahifasida Ilonga javob tariqasida: “Menga manzilni jo‘nat”, — deya yozib qoldirgan.
Eslatib o‘tamiz, bir necha kun oldin Mark Sukerberg o‘zining jiu-jitsu sparringi tasvirlangan kadrlarni e’lon qilgandi. Videoda Mark jiu-jitsu bo‘yicha mashhur chempion Mark Musumechi bilan mashg‘ulot o‘tayotganini ko‘rish mumkin. Facebook asoschisi MMA’da ishtirok etish uchun mashg‘ulot o‘tayotganini aytib o‘tgan.