Rossiyaning Leningrad viloyati, Vsevolojsk shahridagi harbiy komissariatga o‘t qo‘yishga uringanlikda ayblanayotgan pensioner o‘z kvartirasida o‘lik holda topildi, deb xabar bermoqda “Fontanka” va “Mash na Moyke” Telegram kanallari.
Xabarlarga ko‘ra, 76 yoshli erkak o‘z joniga qasd qilgan.
Marhum 2-avgust kuni Molotov kokteyli (qo‘lbola portlovchi modda) bilan harbiy xizmatga chaqiruv bo‘limiga o‘t qo‘ymoqchi bo‘lgan. Binoga yaqinlashib, bir daqiqadan ko‘proq vaqt davomida uchqun chiqarishga harakat qilgan, ammo yakunda u faqat oyog‘i ostidagi yerga o‘t qo‘ya olgan. Harbiy komissariat binosida bo‘lgan Rossiya gvardiyasi xodimlari olovni oyoqlari bilan o‘chirgan va erkakni hibsga olgan, deb yozadi “Fontanka”.
Ertasi kuni pensionerga nisbatan o‘zganing mulkini o‘t qo‘yish orqali qasddan yo‘q qilish moddasi bo‘yicha jinoyat ishi qo‘zg‘atilgan. U sudga kelish va’dasi bilan ozod qilingan.
“Mash na Moyke” nashrining yozishicha, pensionerni bunday qonunbuzarlikka firibgarlar majburlagan, undan avval ular erkakni kvartirasini sotishga ko‘ndirgan. O‘sha kvartirada pensioner o‘zini o‘zi bo‘g‘ib o‘ldirish belgilari bilan topilgan.
Iyul oyi oxiridan buyon Rossiyada 28 dan ortiq harbiy komissariat bo‘limlariga o‘t qo‘yildi. O‘t qo‘yishga uringani uchun hibsga olinganlarning ko‘pchiligi “FXX xodimlari” nomidan ko‘rsatma bergan firibgarlarning qurboni bo‘lganini da’vo qilmoqda.
Izoh (0)