Keng miqyosli bosqin boshidan beri Rossiya qo‘shinlari Ukrainaga kamida 1 961 ta Shahed tipidagi dronlarni uchirdi. Bu haqda Ukraina prezidenti Vladimir Zelenskiy urushning 526-kuni yakunlari bo‘yicha yo‘llagan videomurojaatida ma’lum qildi.
Uning so‘zlariga ko‘ra, ukrainalik harbiylar kamikadze dronlarining “asosiy qismini” urib tushirishga muvaffaq bo‘lgan.
“Afsuski, hammasi emas. Biz yanada ko‘proq (dronlarni) urib tushirish ustida ishlayapmiz: imkon qadar ko‘proq urib tushirish ustida. Ko‘proq havo mudofaa tizimlariga ega bo‘lish uchun ishlayapmiz”, — deb qo‘shimcha qildi Zelenskiy.
Rossiya armiyasi Ukrainada Eronda ishlab chiqarilgan Shahed-131/136 kamikadze dronlaridan faol foydalanmoqda, ruslar ularning nomini “Geran-1” va “Geran-2” deb o‘zgartirgan. Ukraina hukumati muntazam ravishda Rossiya harbiylari Ukraina harbiy, fuqarolik va energetika obyektlariga dron uchirayotgani haqida xabar berib keladi.
Iyul oyi oxirida Ukraina Qurolli kuchlari Rossiya qo‘shinlari Eronning Rossiyada ishlab chiqarilgan Shahed dronlaridan foydalanishni boshlaganini ma’lum qildi. Ushbu dronlarni yig‘ish Tataristondagi “Alabu”ga maxsus iqtisodiy zonasi hududida amalga oshirilayotgani aytildi. Mahalliy jurnalistlarning surishtiruviga ko‘ra, 15-16 yoshli kollej o‘quvchilari Eron komponentlaridan jangovar dronlarni yig‘ishga majburiy jalb etilmoqda.
Izoh (0)