Rossiyaning Irkutsk viloyati Ust-Ilimsk shahar harbiy komissariatida safarbarlikka chaqirilgan mahalliy fuqaro otishma sodir etdi. Bu haqda Baza Telegram-kanali xabar bermoqda. Harbiy komissar og‘ir yaralangan.
Guvohlarning so‘zlariga ko‘ra, “Hozir hammamiz uyga ketamiz”, — deya 25 yoshli Zinin Ruslan harbiy komissar Aleksandr Yeliseyevga qarata o‘q uzgan.
Dastlabki ma’lumotlarga qaraganda, Zinin bugun, 26-sentabr kuni safarbar etilishi kerak bo‘lgan. Uning harbiy komissariatga qanday qilib qurol bilan kirib kelgani hozircha tushunarsiz, deyiladi xabarda.
Harbiy komissar Yeliseyev ayni paytda kasalxonaga yotqizilgan.
Rossiyada nimalar bo‘lyapti?
21-sentabr kuni Rossiya prezidenti Vladimir Putin Rossiyada qisman safarbarlik e’lon qilish haqidagi farmonni imzoladi. “Vatanimiz, yaxlitligimizni himoya qilish uchun qisman safarbarlikni qo‘llab-quvvatlash zarur, deb hisoblayman”, — dedi Rossiya rahbari.Rossiya mudofaa vaziri Sergey Shoyguning aytishicha, qisman safarbarlik chog‘ida 300 ming zaxiradagi askar chaqiriladi. Uning so‘zlariga ko‘ra, bu Rossiya safarbarlik resursining taxminan 1 foizini tashkil qiladi. Xizmat o‘tab bo‘lgan, harbiy-hisob mutaxassisligi va jangovar tajribaga ega bo‘lganlargina chaqiriladi. Talabalar va shoshilinch xizmat harbiy xizmatchilari safarbar etilmaydi, degan edi Shoygu.
Armiyaga chaqiriladigan odamlar soni ko‘rsatilgan band safarbarlik haqidagi farmonda maxfiylashtirib qo‘yilgan. “Novaya gazeta. Yevropa” nashri xabariga ko‘ra, ushbu bandda bir million kishi armiyaga chaqirilishi haqida aytiladi. Meduza’ning federal vazirliklardan biriga yaqin manbasi aytib berishicha, armiyaga 1,2 million kishini chaqirish rejalashtirilmoqda.
Dastlab Rossiya hududlaridagi harbiy komissarlar safarbarlik bo‘yicha armiyaga chaqirilishi kerak bo‘lgan odamlarga o‘z shahri yoki tumanini tark etishni taqiqlagandi, biroq 23-sentabrga kelib, ularning buyruqlarida Rossiyadan chiqish ketishga nisbatan taqiqlar paydo bo‘ldi.
Meduza manbalari ma’lum qilishicha, DXR, LXR va Ukrainaning Xerson va Zaporojye viloyatlaridagi bosib olingan hududlarda “referendum” tugaganidan keyin safarbarlik yoshidagi erkaklarga Rossiyadan chiqib ketish taqiqlanishi kutilmoqda. Taqiq 28-sentabr kuni kiritilishi mumkin.
Izoh (0)