Ukrainada harbiy operatsiya start olishi bilanoq, Rossiya harbiy komissariatlariga o‘t qo‘yish boshlangandi, yetti oy ichida harbiy komissariatlar va ma’muriy binolarga 50 dan ortiq hujumlar amalga oshirildi. Yozga kelib, bunday hujumlar soni qisqara boshladi — avgustda bor-yo‘g‘i bitta holat qayd etildi, mayda esa bunday voqealar 14 tani tashkil qilgandi. Ammo safarbarlik e’lon qilingach, o‘t qo‘yishlar sezilarli darajada ko‘paydi. Mediazona shunday hodisalar haqida ma’lumot berdi.
Harbiy komissariatga o‘t qo‘yilishi bilan bog‘liq birinchi holat haqida “maxsus operatsiya” boshlanganidan keyin bir necha kun o‘tib, ma’lum bo‘ldi. O‘shanda 21 yoshli Kirill Butilin Podmoskovyedagi Lukovitsi shahrida harbiy komissariatga “Molotov kokteyllari”ni uloqtirgandi. 8-mart kuni Telegram-kanallardan birida voqea aks etgan video paydo bo‘lgandi. Butilin chaqiruvchilarning shaxsiy hujjatlar to‘plamlaridan iborat arxivni yo‘q qilib, safarbarlikka xalal berish maqsadida harbiy komissariatni yoqib yuborganini ma’lum qilgan. “Sinfdoshlarimni asirga tushganlar orasida yoki halok bo‘lganlar ro‘yxatida ko‘rmayman, deb umid qilaman”, — deb yozgan u o‘z postida.
Butilin ushbu postini e’lon qilgan kuniyoq qo‘lga olingan. Rossiyaning ba’zi OAVlari xabariga ko‘ra, bu vaqtgacha u Litva va Belarus chegarasigacha yetishga ulgurgan, u yerdan esa Rossiyaga yuborilgan va Lukovitsida politsiya bo‘linmasiga keltirilgan. 13-mart kuni, IIV xabariga qaraganda, u politsiya bo‘limi binosini o‘zboshimchalik bilan tark etgan”, biroq kechqurunoq yana ushlangan.
Dastlab Butilinga vandalizm haqidagi modda bo‘yicha ish ochilgan, biroq bu modda tez orada “o‘t qo‘yish”ga o‘zgartirilgan, keyinroq esa ishga “teraktni amalga oshirish” ham qo‘shilgan. Iyun oyida Butilin terrorchilar va ekstremistlar ro‘yxatiga kiritilgan. U 20 yilgacha ozodlikdan mahrum etilishi mumkin.
“Mediazona” hisob-kitoblariga ko‘ra, urush boshlanganidan buyon Rossiyaning qariyb 40 ta hududida harbiy komissariatlarga va boshqa davlat muassasalariga 50 dan ortiq hujumlar amalga oshirilgan. Aksiyalarning ko‘pchiligidan yetgan zarar ahamiyatsiz bo‘lgan. Hujumlar ko‘proq ramziy ma’noga ega bo‘lgan — “qayerdadir binoning faqat derazalari, eshigi yoki devorining yuza qismi yonib ketgan, qayerdadir esa mol-mulkka umuman ziyon yetmagan”, — deyiladi xabarda.
Ammo ba’zi hollarda yetkazilgan zarar katta bo‘lgan. Sobiq qishloq o‘qituvchisi Ilya Farber ikki kunlik farq bilan Udmurtiyaning Igra qishlog‘ida harbiy komissariatga va chaqiruv punktiga o‘t qo‘ygan. Birinchi holatda Ikkinchi jahon urushi faxriylarining xizmat hujjatlari va kartotekasi saqlangan xona yonib ketgan bo‘lsa, ikkinchi holatda xodimlarning shaxsiy buyumlaridan iborat xona yong‘in ichida qolgan.
Yana ikkita yirik yong‘in Posmoskovyedagi Shelkovo shahrida (mahalliy harbiy komissariatda ikkita kabinet va arxiv zarar ko‘rdi) va Mordoviyaning Zubova Polyana qishlog‘ida (yong‘in ikkita qavatni, shu jumladan, harbiy xizmatga chaqiriluvchilar ma’lumotlari saqlanadigan xonalarni qamrab oldi) sodir bo‘ldi.
Harbiy komissariatlardan tashqari, mahalliy ma’muriyatlar, politsiya, FXX va Rosgvardiya binolari ham hujumlar nishonlariga aylandi. FXX binolariga hujumlar Krasnodar va Nijniy Novgorodda, politsiya bo‘limlariga hujumlar esa Moskva, Dog‘iston va Vladivostokda sodir bo‘ldi. Komsomolsk-Amurda 50 yoshli erkak Rosgvardiya bo‘linmasiga o‘t qo‘yishga urindi.
May o‘rtalarida rassom Bogdan Ziza Yevpatoriya ma’muriyati binosining old tomoniga sariq va ko‘k bo‘yoqlarni sepib yubordi, so‘ng, tergov versiyasiga ko‘ra, binoga portlovchi aralashma solingan shishani uloqtirdi, biroq u portlamadi. Rassom qo‘lga olingan, u tergov izolyatorida. Unga nisbatan terakt tayyorlash haqida jinoyat ishi ochilgan.
Ta’kidlanishicha, dastlab o‘t qo‘yishlar haqidagi ishlar “bezorilik” yoki “mol-mulkka qasddan zarar yetkazish” kabi nisbatan yengil moddalar doirasida ko‘rib chiqilgan. Biroq yozga yaqin huquq-tartibot organlari ularni ancha og‘irroq jinoyatlar deb baholay boshladi. Masalan, bahorda Ivanov viloyatida harbiy komissariatga o‘t qo‘yishga uringanlik uchun hibsga olingan Dmitriy Lyamin iyul boshida terakt amalga oshirishda ayblandi.
Iyun boshida harbiy komissariat binosiga yonib turgan lattani uloqtirgan vladivostoklik 21 yoshli Andrey Alekseyev va iyun o‘rtalarida FXXning Krasnodar boshqarmasi binosi yaqinida gilamchani yoqib yuborgan 46 yoshli Igor Paskar ham terrorizmda ayblandi. Uglichning 21 yoshli fuqarosi terakt amalga oshirishga urinishda ayblandi — u harbiy komissariat yaqinida “Molotov kokteyllari” bilan qo‘lga olingandi.
Nashr taxmin qilishicha, safarbarlik boshlanganidan keyin bunday ishlar yanada ko‘payadi. 21-sentabrdan keyin sodir etilgan o‘t qo‘yish bilan bog‘liq 18 ta holat tufayli to‘rt kishi qo‘lga olingan. Ularga aynan qanday moddalar bo‘yicha ayblovlar qo‘yilishi noma’lum. Urushning yarim yili ichida harbiy komissariatlarga o‘t qo‘yilishi haqidagi jinoyat ishlarining birortasi ham sudgacha borib yetgani yo‘q.
Izoh (0)