Bir sutkada Rossiyadagi harbiy komissariat binolariga o‘t qo‘yishga kamida 14 ta urinish qayd etildi, deb yozmoqda rus tilidagi OAV va Telegram kanallari. Qonunbuzarlikni sodir etishda ayblanib hibsga olinganlarning aksariyati — ayollar.
Xususan, OAV Sankt-Peterburg, Moskva viloyati, Qozon, Omsk, Kaluga, Verxneuralsk, Rossosh, Volsk, Kopeysk shaharlari va Aginskoye posyolkasidagi harbiy komissariat bo‘linmalarini yoqishga urinishlar haqida xabar berdi.
Baza Telegram kanali xabariga ko‘ra, 1-avgust kuni Kopeyskda Chelyabinsk po‘lat konstruksiyalari zavodining 54 yoshli xodimi harbiy komissariatga o‘t qo‘yishga uringani uchun qo‘lga olingan. U komissariatning tibbiyot bo‘limiga Molotov kokteyli (qo‘lbola portlovchi modda) uloqtirgan.
O‘sha kecha Verxneuralskdagi harbiy komissariatga ham o‘t qo‘yishga urinilgan. Voqea joyida 34 yoshli mahalliy fuqaro qo‘lga olingan. Kalugadagi boshqa harbiy bo‘linmada 78 yoshli nafaqaxo‘r o‘t qo‘yishga uringani uchun qo‘lga olingan, deyiladi xabarda.
Boshqa hududlarda bunday qoidabuzarlikni sodir etganlar orasida maktab o‘quvchilari va ayollar bor. Shu bilan birga, harbiy komissariatga o‘t qo‘yganlarning hech biri siyosiy talablar haqida gapirmagan.
Izoh (0)