Surxondaryo viloyatidagi bolalar bog‘chalarida tekshiruv boshlandi. 10 nafardan ortiq bog‘cha mudiri lavozimidan olindi. Bu haqda hokimlik axborot xizmati xabar tarqatdi.
Qayd etilishicha, viloyatdagi mavjud davlat va nodavlat maktabgacha taʼlim tashkilotlarida bolalar uchun yaratilgan sharoitlar, ularga taʼlim-tarbiya berish jarayonlarini sifatli tashkil etish holati o‘rganilgan.
Holat Qumqo‘rg‘on tumanidagi 7-sonli davlat maktabgacha taʼlim tashkilotida videoselektor tarzida muhokama qilindi. Viloyat hokimining topshirig‘i bilan Jarqo‘rg‘on, Angor, Termiz, Muzrabot, Qiziriq, Bandixon, Qumqo‘rg‘on, Sho‘rchi va Oltinsoy tumanlarida soha mutaxassislari va OAV vakillaridan iborat ishchi guruhi bog‘chalar faoliyatini tanlanma asosida o‘rgandi. Muhokama avvalida ushbu o‘rganish davomida aniqlangan holatlar aks ettirilgan videolavha namoyish etildi, — deyiladi hokimlik axborotida.
.jpg)
Hududlarda o‘rganilgan bog‘chalarning ayrimlarida obodonlashtirish ishlari qoniqarsizligi, bolalar ovqatini tayyorlash meʼyorlariga rioya etilmagani, taʼlim-tarbiya jarayonlari to‘g‘ri yo‘lga qo‘yilmagani aniqlangan.
Xato-kamchiliklar aniqlangan qator bog‘cha mudiralari va masʼullarini ishdan olish, ayrimlarini qonun doirasida javobgarlikka tortish masalasini ko‘rib chiqish bo‘yicha ko‘rsatmalar berildi. Viloyat rahbari muhokama qilingan bog‘chalar misolida barcha maktabgacha taʼlim tashkilotlari faoliyatini o‘rganish, kamchiliklarni bartaraf etish bo‘yicha muddat va vazifalarni belgilab berdi. Ishchi guruhga topshiriqlar ijrosini qayta o‘rganish vazifasi yuklandi, — deydi masʼullar.
Qo‘shimcha qilinishicha, viloyatdagi bog‘chalar holatini o‘rganish davom etadi.
Izoh (0)