Tarmoqlarda Surxondaryo viloyati hokimi Ulug‘bek Qosimovning Denov tumanida o‘tkazgan yig‘ilishi va unda fermerlardan birini qamoqqa olish bo‘yicha topshiriq bergani aytilgan videolar tarqaldi. Viloyat hokimligi axborot xizmati bunga izoh berdi.
Videomaterialda 2023-yilning 4-iyul kuni Denov tumanining “Hazorbog‘” hududida qishloq xo‘jaligi masalalariga bag‘ishlab soha mutasaddilari va fermer xo‘jaliklari rahbarlari ishtirokida o‘tkazilgan yig‘ilish aks etgan. Unda viloyat hokimi tumandagi ayrim fermer xo‘jaliklari paxta dalalarida agrotexnik tadbirlarni o‘z vaqtida va sifatli o‘tkazish bilan bog‘liq muammolar mavjudligi, ajratilgan resurslardan maqsadsiz foydalanish holatlariga yo‘l qo‘yilayotganini tanqid qilib, mutasaddilarga mavjud holatlarni o‘rganish va noqonuniy xatti-harakatlarga huquqiy baho berish topshirig‘ini bergan, — deyiladi hokimlik izohida.
Taʼkidlanishicha, yig‘ilishdan so‘ng esa xatti-harakatlariga huquqiy baho berilishi kerakligi aytilgan fermer xo‘jaliklari rahbarlariga kamchiliklarini to‘g‘rilash uchun imkon berilgan.
Mavjud muammolar qisqa muddatda bartaraf etilgan. Hech qaysi fermer xo‘jaligi rahbari qamoqqa olinmagan, — deydi hokimlik axborot xizmati rahbari Murodbek Davlatov.
Telegram’da tarqalgan videoda Ulug‘bek Qosimov “Muttaham, yurishing fason bo‘lib, hamma narsaga tupurib qo‘ygansan. Denov yonib ketmaydimi, e senga o‘xshagan, bunaqa vijdonsiz boqibeg‘amni hayotimda ko‘rmaganman. Ko‘r-ko‘rni qorong‘ida topadi, bir-biringga (hokim o‘rinbosari Alisher Alimardonov) mossan. Denovni o‘ldirib, tamom qilding, hamma tumandan orqada. Sharmanda qilib, yer ostiga ko‘mib yubording. Yoz, Ilhom og‘ayni, bugun qamoqqa olasan. Ishingning tayini yo‘q, yuribsan tentirab, hammang o‘yinchilik qilib, o‘yinga o‘tib olgansanlar, noinsoflar. Bir kun yurib, yoqamni ushladim, hamma narsa ‘samatok‘”, — degandi.
Izoh (0)