UNESCO Venetsiyani yo‘qolib ketish xavfi ostidagi obyektlar ro‘yxatiga kiritishga chaqirdi

UNESCO yana bir bor Venetsiya shahrini yo‘qolib ketish xavfi ostida turgan Jahon merosi obyektlari ro‘yxatiga kiritishni tavsiya qildi.

Mutaxassislarning fikricha, shahar infratuzilmasining rivojlanishi, iqlim o‘zgarishi oqibatlari, shuningdek, ommaviy turizm Venetsiyaning o‘ziga xos umumbashariy qadriyatlari tiklanmas darajada o‘zgarib ketishiga tahdid solmoqda.

Shu munosabat bilan UNESCO’ning Butunjahon merosi markazi “Venetsiyani yo‘q bo‘lib ketish xavfi ostida turgan Jahon merosi obyekti sifatida ro‘yxatga olishni tavsiya qildi”. Tashkilot a’zolari ushbu tavsiyani kuzda bo‘lib o‘tadigan yig‘ilishda ko‘rib chiqishi kutilmoqda, deb xabar beradi AFP.

Eslatib o‘tamiz, bundan ikki yil avval UNESCO ekspertlari shahar maqomini o‘zgartirishga chaqirgan edi. Biroq o‘sha paytda bu tashabbus ma’qullanmadi.

Aprel oyida Venetsiya aholisi so‘kinish so‘zlarni boshqalarga qaraganda ko‘proq ishlatadigan Italiya shaharlari ro‘yxatida birinchi o‘rinni egallagandi.